“Ró HAKSOLOK Seidauk Mai”

DILI, (TATOLI) – Vise Ministru Obras Públika, Transporte no Komunikasaun, Inácio Moreira informa, to’o oras ne’e daudauk Ró HAKSOLOK sidauk bele mai tanba  governu prepara hela ponte movel ida ho razaun ramp door  (odamatan) ró ne’e husi sorin la’ós husi oin ka kotuk hanesan ró bain-bain.

“Ita nia ró HAKSOLOK ne’ebé halo iha Portugal, ninia ramp door dezeñu ne’ebé uluk sira prepara iha fali sorin, la’ós oin lae kotuk, tanba  ne’e mak halo dezembarke mai iha ita ninia portu ne’e ladi’ak tanba  kuandu tasi tun nia sa’e fali no tasi sa’e nia tun fali ne’ebé dala ruma mós ladi’ak,” Vice Ministru informa ba jornalista sira iha Faról, ohin.

Nia dehan tan, agora daudauk obra ponte movel ne’e iha prosesu aprovizionamentu liuhosi Komisaun Nasionál Aprovizionamentu (CNA – sigla portugés) halo hela avaliasaun ba dokumentu husi kontratór sira.

Obra ne’e sei halo ho total orsamentu tokon US$4, no bele finaliza durante fulan lima to’o neen de’it.

Governante ne’e mós klarifika ba públiku katak, to’o ohin loron Governu Timor-Leste laiha problema ho kompañia ida halo Ró HAKSOLOK, maski antes ne’e iha problema tanba kontratór prinsipál deve osan sub-kontratór tanba  ne’e sira lori malu to’o Tribunal maibé agora sira rezolve ona. Ho ida ne’e, bainhira obra pote movel ne’e remata, Ró HAKSOLOK sei to’o mai Timor-Leste iha tempu badak.

Ró HAKSOLOK hetan bensaun hosi Eis Bispu Diocese Dili, Dom Carlos Filipe Ximenes Belo, iha sidade Figueira, iha loron loron 26 Maiu 2017.

Madre Provinsiál, Guilhermina Marçal mak eskolla hanesan inan sarani ba Ró HAKSOLOK ne’ebé Timor-Leste sosa ho folin tokon EUR 13,7 ho iha kapasidade tula ema na’in 377 no viatura karreta sanulu resin lima.

Jornalista: Julia Chatarina | Editór: Manuel Pinto

Imajen: Vise-Ministru Obra Públika, Transporte no Telekomunikasaun II, Inácio Freitas Morreira. Foto/António Gonçalves.