Don Virgílio Husu Jerasaun Foun Fiel Ba Ezemplu Hosi Veteranu

DILI, (TATOLI) - Bispu Dioseze Dili, Don Virgílio do Carmo da Silva, hateten jerasaun foun sira presiza konserva nafatin espíritu konstánsia, sakrifísiu no intelijénsia hosi veteranu, martir no kombatente sira iha pasadu nune’e bele fó kontribuisaun ne’ebé di’ak ba nasaun ida ne’e.

“Harohan ba ita ne’ebé sei moris atu Fiel nafatin ba ezemplu ne’ebé veteranu sira husik hela ba ita atu ita tau interese komún ás liu duké interese pesoál,” Don Virgílio hato’o lia hirak ne’e bainhira prezide misa ba Loron Nasionál Veteranu iha Igreja Katedrál, Vila Verde, Dili, sesta loro kraik ne’e.

Nia esklarese veteranu, martir no kombatente sira sakrifika sira nia an tanba bem komún timoroan tomak nian.

“Loron ohin konvida ita atu fó onra ba veteranu, martir no kombatente sira nia kontribuisaun ba luta independénsia. Maromak sei la taka matan ba sira ne’ebé mate ona,” Don Virgílio haklaken.

Amu Bispu hatutan luta ba independénsia la’ós fásil maibé hakat liu kro’at oi-oin, hakat liu ran sulin barak no mate.

“Nufin ita hetan objetivu ida konkretu (independénsia), tanba ita nia veteranu, martir no kombatente sira ho espíritu ida de’it katak ‘Mate ka Moris’ ukun rasik an,” Don Virgílio haktuir.

Misa ida ne’e organiza hosi Sekretaria Estadu Veteranu hamutuk ho Komisaun Omenajen. Partisipa iha misa refere maka Prezidente Repúblika, Francisco Guterres Lú Olo, veteranu sira ne’ebé ativu iha Forsas Armadas no hirak ne’ebé reformadu ona inklui membru Parlamentu Nasionál no membru Governu sira.

Jornalista: Xisto Freitas | Editór: Manuel Pinto

Imajen: Don Virgílio prezide misa ba Loron Nasionál Veteranu iha Igreja Katedrál, Vila Verde, Dili, sesta loro kraik ne'e.