Númeru hosi ema sira ne'ebé hamlaha aumenta ba millaun 124 iha 2017

Intensifikasaun hosi konflitu sira no rai-maran beibeik iha rejiaun oioin iha mundu halo aumenta ona ema hamlaha hamutuk millaun 124 iha nasaun hamutuk 51 iha tinan 2017, haktuir hosi estimativa ne'ebé fó sai iha loron-kinta ne'e.

"Relatóriu mundial kona-ba krizi hahán 2018", publika hosi Uniaun Europeia, Organizasaun ONU nian ba Alimentasaun ho Agrikultura (FAO) no Programa Alimentar Mundial (PAM), indika katak rejista ona aumentu ida hosi ema millaun 11 ne'ebé maka afetadu.

Iha tinan 2016, kalkula ona ema hamutuk millaun 108 iha mundu maka hasoru situasaun ida inseguransa hahán todan, iha tinan 2015 númeru ne'e maka hamutuk millaun 80.

"Ema na'in ida entre ema na'in tolu hamlaha iha nasaun sira ne'ebé hasoru krizi ne'ebé akontese kleur", hatete hosi diretor-jeral FAO nian, José Graziano da Silva, iha konferénsia imprensa.

Ema prinsipal sira ne'ebé afetadu ho situasaun "hamlaha maka'as" iha tinan 2017 inklui iha nasaun sira ne'ebé maka envolve iha konflitu ka ne'ebé "laiha seguransa maka'as" hanesan "Iémen, norte Nijéria nian, Repúblika Demokrátika Kongo, Sudaun-Súl ho Birmánia", hatete hosi estudu.

Iha Áfrika oriental ho austral, "rai-maran beibeik sai hanesan fator importante" tanba "hamenus beibeik ona kolleita iha nasaun sira ne'ebé maka hasoru ona nível aas hosi inseguransa hahán nian", nia hatutan.

Tinan ne'e, konflitu sira ho inseguransa sai nafatin hanesan "kauza prinsipal sira hosi krizi hahán nian", ne'ebé afeta Afeganistaun, Repúblika Sentru-Afrikanu, Repúblika Demokrátika Kongo, nordeste Nijéria nian, rejiaun lagu Xade, Sudaun-Súl, Síria ho Iémen, nune'e mós iha Líbia ho Sahel sentral (Mali ho Níjer).

Tuir dokumentu, Iémen sei sai hanesan "nasaun ho krizi alimentar maka'as iha nível mundial" no situasaun ne'e sai aat liután tanba "difikuldade asesu, destruisaun ekonomia nian no epidemia sira".

Iha Áfrika, impkatu hosi rai-maran sei aumenta inseguransa alimentar iha zona pastorísiu sira iha Somália, sudeste Etiópia ho leste Kénia nian, nune'e mós iha nasaun sira hosi Áfrika osidental no hosi Sahel, hanesan Senegal, Xade, Níjer, Mali, Mauritánia ho Burkina Faso.

Notísia di'ak úniku akontese iha Áfrika austral, ne'ebé kalkula katak iha parte di'ak ida tanba aumentu hosi produsaun sereais sira iha tinan 2017 no tanba presu tuun hosi hahán sira.

"Ita iha obrigasaun moral hodi halo di'ak liután no ita iha dalan sira no ita hatene halo. Ita tenki hapara ho limiti sira ne'ebé kleur ona haketak ator sira hosi ajuda humanitáriu no sira hosi dezenvolvimentu nian", António Guterres, sekretáriu-jeral ONU nian, hatete no haktuir iha relatóriu.

SAPO TL ho Lusa