LUIS LOBATO “PARTISIPA ENKONTRU AMP”

DILI – Kuadru importante ida hosi partidu FRETILIN atual vise Ministru ba Saúde, Luis Lobato konsege partisipa tiha enkontru Alliansa Mudansa ba Progresu (AMP).

Iha loron Sabadu, 24 Marsu kuaje tuku 9 dadersan, militante no simpatizante AMP nian hamutuk ona iha salaun boot igreja katedral nian nakonu. Iha dadersan ne’e, ema hotu kontente no alegria hein hela hodi simu no rona informasaun ruma hosi Kay Rala Xanana Gusmão.

“Ema hotu tur konversa ba malu iha salaun boot ne’e nia laran derepente kamarada Luis Lobato tama iha odamatan salaun no ba hakneak iha salaun nia oin, no kontinua hase sekretariu jeral partidu CNRT, Francisco Kalbuadi Lay katak agora kabun boot loos,” esplika Julio Goncalves ba Tempo Timor iha salaun igreja Katedral, Dili, Sábadu (24/03).

Nia hatutan, eventu ne’e nu’udar enkontru AMP nian ne’ebé lidera direitamente hosi Kay Rala Xanana Gusmão hodi fahe informasaun ba juventude no grupu arte marsiais sira ne’ebé interese tebes ba AMP iha rai laran.

Entretantu, Paizinho Tilman katak, nia mós sente hakfodak tebes ho prezensa Luis Lobato ho nia kaben iha eventu ne’e, tanba imposivel lideransa boot ida hanesan nia bele ba partisipa fali enkontru AMP nian.

Nia hatutan, Luis Lobato hamutuk ho nia fen tama ba salaun hosi odamatan parte liman loos, no simu hosi Francisco Kalbuadi Lay no Francisco Guterres mós hakfodak tiha, no Kalbuadi fó ‘bem vindo maun boot’ ne’e mak Luis Lobato hatan fali katak ita boot nia kabun agora boot tan de’it. Hafoin konversa ne’e, Kalbuadi mós husik Luis Lobato ho nia kaben la’o ba oin, no konsege tur tiha itoan iha kadeira liña oin kuaje minutu lima, no hare ba spanduk boot iha oin ho lia “Dialogu Maun Boot Kay Rala Xanana Gusmão ho Forsa Politika Sira Ne’ebé Apoia AMP” mak nia fen hakfodak katak sira nain rua tama sala.

“La’e, ami hanoin kala ida ne’e enkontru igreja nian ne’e mak ami mai, tanba ami mós hetan konvite,” Tilman haktuir hikas deklarasaun Luis Lobato.

Hafoin akontesementu, Luis ho nia kaben la’o sai hosi salaun laran no akompaña hosi Kalbuadi la’o sai ba liur.

Entretantu, sira ne’ebé tur iha kadeira oin katak, situasaun ne’e mosu, no akontese tanba dalaruma matebian Nicolau Lobato mak “babeur” sira nain rua hodi ba partisipa enkontru AMP nian ne’e, maibé tuir loloos sira ba tuir enkontru igreja nian, maibé tama sala ba enkontru AMP nian. Sira nain rua, la’o sai hosi enkontru AMP nian no ba tuir fali sira nia enkontru igreja nian. (Oki)

Tempo Timor

LEE MOS IHA TEMPO TIMOR