Tékniku Sira Presiza Halo Estudu ba Konstrusaun Turístika

DILI, (TATOLI) – Sekretaria Estadu Konsellu Ministru no Komunikasaun Sosiál (SEKMKS), Matias Boavida, hateten projetu konstrusaun turístika ne’ebé sei implementa iha Tasi-Tolu ho Tibar, tékniku sira presiza halo estudu di’ak hafoin estabelese.

“Reuniaun estraordináriu Konsellu Ministru (KM) aprova proposta ne’ebé aprezenta hosi TradeInvest Timor-Leste, I.P kona-ba akordu espesiál investimentu, maibé antes halo konstrusaun komplexa turístika tékniku sira presiza halo estudu”, Matias Boavida ba jornalista sira hafoin enkontru KM iha Palásiu Governu, ohin.

Nia hatutan akordu konstrusaun projetu ne’e sei asina bainhira tékniku sira aprezenta ona dadus liuhosi estudu ne’ebé iha signifika governu aprova duni ona akordu entre governu Timor-Leste ho Pelican Paradise, maibé sei hein tékniku sira atu halo estudu di’ak liu atu bele implementa akordu espesiál.

“Pelican Paradise aprova ona maibé ita sei hein tékniku sira aprezenta dadus molok ita implementa, enkuantu tékniku sira ne’e sei mai hosi Ministériu Turizmu, Ministériu Administrasaun Estatal (MAE) no seluk tan”, katak tan.

Nune’e, Estadu Timor-Leste kompromete direitu superfisie ho relativamente iha área ne’ebé previstu ona iha planu eh dezenvolvimentu ba projetu konstrusaun komplexa turístika iha Tasi-Tolu no Tibar, enkuantu investimentu ne’e sei fó aprosimadamente servisu ba ema 1500 ba faze konsstrusaun no sei iha mós ema 1300 ba postu permanente.

Enkuantu, akordu espesiál hosi investimentu  entre governu Timor-Leste no Empreza Pelican Paradise Group Limited, ne’ebé abrigu ba lei investimentu privadu iha vigór no aprova liuhosi lei númeru 17/2011, 28 setembru, define rejime jurídiku ida espesiál ba peojetu ne’ebé revistu investimentu.

Entretantu, valór ne’ebé ronda hosi $310,000,000.00, eskala projetu ba investimentu ne’e importante tebes ba importansia nasionál ho respetivu impaktu ekonómiku, sosiál no teknolójiku ne’ebé mak justifika espresamente atu aprezenta proposta ba akordu espesiál investimentu.

Investór ne’e hosi internasionál Malázia, Pelican Paradise hodi halo investimentu turístika iha Timor-Leste.

Jornalista: Zezito Silva | Editora: Rita Almeida

Imajen: Sekretáriu Estadu Konsellu Ministru no Komunikasaun Sosiál, Matias Boavida