segunda-feira, 30 de abril de 2018

Rejime Salariál Ba Traballadór Injustu

PARTILHAR

DILI, (TATOLI) - Eis Pároku Parókia Santu António Manatuto, Pe. Martinho Gusmão konsidera katak Rejime Salariál ba traballadór sira injustu tanba maske sasán nia folin sa’e maka’as, maibé traballadór sira nia saláriu la sa’e.

“Ne’e halo kualidade moris nian la sa’e. Ikus liu, distribuisaun ba bens ne’e halo ita la haree ninia fairness. Signifika, maske ema han dadauk maibé sente la bosu no ema ne’ebé kaer bikan mamuk ne’e hein nafatin,” Amu Martinho dehan kestaun ne’e ba Ajénsia Tatoli iha nia hela fatin, Dili, segunda ne’e, relasiona ho Loron Mundiál Traballadór ne’ebé monu iha loron 1 Maiu, aban.

Nia hatutan se korupsaun mosu tan, entaun rejime salariál la sustentável liu-tan ba kualidade vida traballadór ka populasaun ki’ik sira nian.

“Ha’u rona kona-ba kresimentu ekonómiku, maibé la haree ninia impaktu ba justisa distributiva. Traballadór iha setór públiku iha duni saláriu estável, maibé labele sustenta vida loro-loron nian,” Amu Martinho esplika.

“Traballadór setór privadu depende ba projetu Estadu. Agora traballadór doméstika maka ita labele sukat, tan agrikultura no produtu lokál seidauk tama iha sasukat ba kresimentu ekonómiku. Se iha mós ha’u lahatene. Ha’u hatene de’it katak indústria alimentár ne’e barak liu maka ita konsumu hosi liur,” nia esklarese.

Durante kampaña eleitorál, Amu haktuir, líder partidu polítiku sira la toka injustisa distributiva maibé sura kolen no sura terus ba ema ki’ak no mukit sira iha aldeia no suku.

Tuir Padre Martinho katak Governu tenki halo jestaun ba justisa sosiál no hahú buka atu halo kampaña atu hamoris optimizmu foun, horizonte foun, halo foinsa’e sira haree loron matan moris foun nian.

Iha parte seluk, ativista pro traballadór no povu ki’ik, Juvinal Diaz hateten Estadu sei falla atu dignifika traballadór sira tanba traballadór sira ho saláriu mínimu tebes ne’ebé susar atu hadi’a sira nia moris.

“Saláriu mínimu la korespondente ho naha ekonomia ohin loron, ne’ebé fó implikasaun ba família traballadór sira atu bele hadi’a sira nia moris,” nia dehan.
Tuir Juvinal katak saláriu mínimu tenke ajuda traballadór sira nia família atu asesu ba edukasaun, saúde no moris di’ak.

Nia husu ba Governu atu kria kampu serbisu, investimentu serbisu sosiál ne’ebé sufisiente, kontrola inflasaun atu bele ajuda traballadór sira nia moris di’ak.

Jornalista: Xisto Freitas | Editór: Manuel Pinto

Imajen: Traballadór sira hala’o hela serbisu. Imajen espesiál.
PARTILHAR

Author: verified_user

Publicação luso-timorense sem fins lucrativos

0 comentários: