Opozisaun Duvida ho Dívida Ba Projetu 142

DILI: Partidu opozisaun iha Uma Fukun Parlamentu Nasionál duvida makaas deve boot ne'ebé governu halo. Ne'e duni, husu atu esklarese projetu hamutuk 142 ne’ebé hamosu dívida boot ba Governu.

Vise-Prezidente Bankada Partidu Demokrátiku (PD) Adriano do Nascimento hatete, nasaun presiza duni osan atu halo dezenvolvimentu nasionál liu husi investimentu públiku, atu bele garante sirkulasaun osan iha baze hodi povu sira bele hetan benefísiu ba moris.

Nia dehan, polítika orsamentál governu nian ne’ebé propoin atu foti osan hodi selu tusan ne’e sei liga ba prosesu aprovizionamentu. Tanba ne’e, iha buat barak presiza atu diskute ho kle'an tuir regra orsamentál nian.

“Ita hotu hatene iha prosesu kampaña 2017 ho projetu 142 ne’ebé fahe de’it sem aprovasaun husi Parlamentu Nasionál, kualkér orsamentu ba projetu ne’ebé governu atu implementa ne’e tenke tuir korredór aprovasaun orsamentu iha PN”, dehan Adriano, iha Uma Fukun PN, horisehik.

Nia hatete, projetu 142 ne’ebé implementa ona ne’e governu la prevé tanba la tama iha faze planeamentu orsamentu nian, tanba ne’e sei husu ba governu atu esklarese halo didi'ak.

Iha VII Governu, momentu ne'ebá la halo pagamentu tanba halo investigasaun ba projetu hirak ne’e, maibé iha VIII Governu ne’e oinsá sira atu selu ka la selu. Karik atu selu entaun selu projetu ne’ebé.

Adriano hatete, sistema utilizasaun finansas governu PN tenke aprova no Prezidente Repúblika halo promulgasaun hafoin bele implementa projetu, la'ós halo implementa uluk projetu mak ba debate osan no aprova hodi selu emprezáriu implementadór sira.

Nia hatete, pozisaun ne’e sei haree no rona esplikasaun governu nian ba selu dívida ne’e, karik selu projetu ne’ebé ho kontratu ne’e la buat ida.

Jacinto Xavier | independente