DILI, (TATOLI) – Deputadu
sira iha Parlamentu Nasionál hatudu asaun pro-kontra ba legalidade ezisténsia
Rádiu Televizaun Maubere (RTM) liuhusi diskusaun espesialidade orsamentu ba
Ministériu Reforma Lejizlativa no asuntu Parlamentár no Sekretaria Estadu
Komunikasaun Sosiál, segunda ne’e, iha plenária Parlamentu Nasionál.
Deputada bankada CNRT, Albina
Marçal, husu Sekretáriu Estadu Komunikasaun Sosiál, Merício Juvenal Akara, atu
fó atensaun ba RTM tanba durante ne’e RTM laiha lisensa frekuénsia hosi
Autoridade Nasionál Komunikasaun (ANC-sigla portugés).
Aleinde ne’e, deputadu bankada
PLP, Francisco de Vasconcelos, hatutan nasaun barak kestiona partidu polítiku
ida iha nia mídia komunikasaun rasik, tanba bele partidariza organizasaun
liu-liu mídia sira no bele halo manipulasaun ba faktu.
Iha biban ne’e, Sekretáriu Estadu
Komunikasaun Sosiál, Merícia Juvenal Akara, reforsa tan katak nia haruka ona
karta ba ANC iha loron 2 agustu liu-ba hodi husu informasaun kona-ba RTM nia
legalidade, maibe en-felizmente ANC responde katak RTM seidauk hetan lisensa.
Hatán ba kestaun ne’e, deputada
bankada FRETILIN, Maria Angélica Rangel, esplika loke RTM tanba kumpri rekizitu
legal ne’ebé lei aplika no sujere ba deputadu Francisco Vasconcelos atu lalika
kópia lei internasionál mai aplika iha rai ne’e.
Nia haktuir durante RTM eziste,
seidauk halo propaganda falsu hasoru Governu ka Estadu TL hanesan mídia partidu
balun prátika.
Momentu ne’e Rangel entrega
dokumentu legál RTM nian ba primeiru-ministru iha plenária, nu’udar átu ida fó
koñesimentu ba primeiru-ministru katak ezisténsia RTM ne’e legál.
Iha parte seluk, Xefe Bankada
FRETILIN, Aniceto Guterres, subliña demokrasia iha Estadu Direitu Demokrátiku
ne’e lei maka manda, katak se Timor-Leste tama iha asosiasaun ida, anaunser
tratadu ruma Parlamentu Nasionál ratifika ona maka foin vinkula.
“Asosiasaun nasaun seluk nian
labele impoin ninia regra mai iha Estadu TL atu bandu fali partidu ida no
organizasaun ida loke ninia mídia rasik”, afirma.
Jornalista: Xisto Freitas | Editora:
Rita Almeida
Sem comentários:
Enviar um comentário