UNTL Uma Na’in ba Konferénsia Internasionál Edukasaun Datolu

DÍLI, (TATOLI) - Institituisaun akadémika públika, Universidade Nasionál Timor Lorosa’e (UNTL) sai uma na’in ba konferénsia internasionál edukasaun datolu, hodi akadémiku nasionál no internasionál sira aprezenta rezultadu peskiza ho tópiku oioin hodi eleva kualidade no halo interkámbiu ideia entre akadémiku sira.

Peskizadór no aprezentadór sira ne’e maioria akadémiku timoroan sira husi UNTL inklui entidade privada balun nomós akadémiku sira husi Austrália, Japaun, Portugal, Brazil no seluk tan.

“Objetivu atu eleva kualidade akadémika iha instituisaun UNTL. Konferénsia internasionál; produsaun no diseminasaun koñesimentu kona-ba siénsia, akademikamente. Puramente siénsia, la konjuga ho polítika ruma,” hateten reitór UNTL, Francisco Miguel Martins ba jornalista sira iha Kampus Liceu, UNTL, ohin, iha marjen konferénsia internasionál ne’e.

Reitór Francisco Miguel Martins informa katak UNTL hahú, kria no institusionaliza ona ofisialmente iha 28 jullu 2011 unidade produsaun peskiza no diseminasaun koñesimentu ne’e.

“Unidade  ida ne’e nia preferénsia atu produz no disemina koñesimentu sientífiku, akadémiku, ne’ebé organiza iha revista akadémika; Veritas, ne’ebé produz ona iha unidade produsaun diseminasaun koñesimentu ne’e, mais de seis volumes ho artigu sientífiku husi profesór nasionál, internasionál ne’ebé ita produz iha dez volume,” informa reitór UNTL.

Alende ne’e, tuir reitór, kuaze fakuldade sira iha universidade públika ne’e hanesan Fakuldade filozofia, Fakuldade Siénsia Sosiál, Fakuldade Agrikultura, Fakuldade Siénsia Teknologia, no Institutu Investigasaun Sientífika; língua ninian, públika ona livru barak.

Ida ne’e hatudu katak timoroan komesa dinamiza ona iha área ida ne’e, ne’ebé uluk ita nunka hanoin atu bok.

“Maibé, ita komesa bok ona no ita haree palestrante sira ho ninia temátiku sira ne’ebé inskreve iha komunikasaun loron tolu ida ne’e, maioria timoroan sira, akadémiku timoroan ne’ebe estuda iha Austrália, Japaun, Filipina, Brazil, Portugal nomós iha país sira seluk ne’ebé mak sira iha interesadu atu públika ka troka sira-nia ideia, interkámbiu iha eventu sientífiku ida ne’e, katak instituisaun UNTL hahú ona bok produsaun obra, mezmu oituan neneik sei barak,” nia haklaken.

“Ita-nia akadémiku mós hanoin ona, envezde hanorin de’it. Alende hanorin, sira mós hakerek livru, peskiza no rezultadu peskiza ne’e sei aprezenta no disemina; habelar, halekar, nia koñesimentu sientífiku ba komunidade akadémika no komunidade enjerál,” reforsa reitór UNTL, Francisco Miguel Martins.

Reitór universidade públika ne’e manifesta katak nia orgullu ho partisipante, palestrante, oradór, aprezenta siénsia ho temátika oioin husi profesór, akadémiku timoroan sira husi universidade mak barak liu duke universidade husi país sira seluk.

“Ita presiza país sira seluk mai kompartilla, eventu internasionál ne’e katak ba sira hotu maibé kuandu ita barak liu ita sente orgullu, ita sente kontente katak ita mós dinámika, ita mós moris, atu krexe no iha kreatividade, inovatividade para halo produsaun sientífiku iha ita-nia rain,” hateten reitór UNTL, Francisco Miguel Martins.

Reitór universidade públika ne’e haktuir katak konferénsia idéntika ne’e hala’o dahuluk iha tinan liubá, envolve profesór timoroan sira barak no akadémiku timoroan sira komesa barak iha konferénsia ida ne’e.

“Ha’u sente orgullu tanba timoroan hahú ona, komesa ona moris i moris ba bebeik, ita hakarak moris ida ne’e ba oin; dinámika, sempre ba oin atu nune’e bele hetan produsaun sientífika ida ita bele públika husi akadémiku timoroan sira,” apresia tan reitór ne’e.

Organizadór ida, Dekanu FEAU, Pedro Soares konsidera katak entidade akadémika sira, sei ki’ak fontes sira hanesan livru tanba ne’e liuhusi produsaun no diseminasaun koñesimentu bele fasilita dadauk informasaun, artigu sientífiku no konteúdu balun.

“Futuru nasaun nian, la iha fontes; livru sira, ne’ebé iha relasaun ho nia (estudante) área no traballu. Entaun, aproveita situasaun ida ne’e informa, hodi bele ajuda traballu sira ne’e liuhusi divulgasaun koñesimentu,” dehan dekanu Pedro Soares iha abertura konferénsia internasionál ne’e.

Eventu ne’e organiza husi UNTL, liuhusi Unidade Produsaun no Diseminasaun Koñesimentu Programa Pós-graduasaun no Peskiza ho Fakuldade Edukasaun Arte no Umanidade (FEAU), ho apoiu husi Departementu Estudu Língua Tetun no Arte (DELTA), Rádiu Akadémika (RA) no seluk tan.

Konferénsia ne’e sei hala’o durante loron rua, hahú ohin no ramata iha sesta (14/09) ho partisipasaun husi sosiedade akadémiku, sosiedade sívil nomós interesadu sira.

Jornalista: Rafy Belo | Editór: Manuel Pinto

Imajen: Partisipante konferénsia internasionál datoluk. Foto: Rádiu Akadémika, UNTL