Enkontru Entre Lú Olo no Xanana Ko’alia Sosa Asaun ConocoPhillips

DILI, (TATOLI) - Xefe Negosiadór Prinsipál ba asuntu Fronteira Marítima, Kay Rala Xanana Gusmão, kinta ne’e, iha Palásiu Prezidente Nicolau Lobato, Bairru Pité, hala’o enkontru ho Prezidente Repúblika (PR), Francisco Guterres Lú Olo, hodi deskuti kona-ba planu atu sosa asaun (saham) pursentu 30 hosi kompaña exploradór mina no gás iha Greater Sunrise, ConocoPhillips.

“Ami ko’alia la barak ida. Hanesan fó hela de’t informasaun,” Lú Olo ba jornalista sira iha otél Novo Turismo, Lecidere, kinta ne’e.

Xefe Estadu husu ba Xefe Negosiadór Prinsipál atu aprezenta relatóriu ne’ebé kompletu liu kona-ba prosesu hahú hosi tratadu Delimitasaun Fronteira Marítima para bele deskuti no hatene kle’an.

“Xefe Negosiadór Prinsipál rasik maka husu atu halo enkontru ho ha’u. Nia (Xanana) mós hanoin katak asuntu tratadu Delimitasaun Fronteira Marítima to’o asuntu sosa asaun ne’e interese nasionál, entaun nia husu atu ami ko’alia maibé la kle’an. Tan ne’e, ha’u husu ba Xanana atu bele aprezenta relatóriu ofisiál para ita bele estuda kle’an liu-tan,” nia informa.

Lú Olo dehan katak Timor-Leste ne’e pertense ba timoroan tomak nian, tanba ne’e, asuntu kona-ba interese nasionál ka interese nasaun nian, hotu-hotu tenke fó hanoin ba malu.

Nia haktuir, Xefe Negosiadór Prinsipál hatán ona atu iha loron tuir mai aprezenta relatóriu ofisiál ba Xefe Estadu.

Maski antes ne’e Xanana halo krítika maka’as hasoru Xefe Estadu maibé nia (Lú Olo) afirma katak, hanesan Prezidente Repúblika, nia la tau preokupasaun ba krítika hirak ne’e maibé nasaun no povu nia vida maka importante liu.

Soru-mutu entre líder istóriku na’in rua ne’e la prevé iha ajenda Prezidente Repúblika hanesan loron baibain, maibé hala’o ho espontaniamente. Tan ne’e, jornalista sira ne’ebé destakadu iha Palásiu Prezidente Nicolau Lobato labele asesu ba enkontru refere.

Enkontru ne’e akontese iha tuku 10:30-11:45 Otl, hafoin Primeiru-Ministru, Taur Matan Ruak, hala’o reuniaun regulár ho Prezidente Repúblika.

Jornalista: Xisto Freitas | Editór: Manuel Pinto

Imajen dok.