DILI, (TATOLI) – Orgaun
lejislatura da-lima liuhosi Vise Prezidente Parlamentu Nasionál, Maria Angelica
Sarmento, agradese ba prestasaun atleta defisiente sira nian iha nivel
internasionál, tanba bele lori Timor-Leste nia naran liuhosi modalidade
desportiva.
“Ida ne’e orgullu boot, agradese
tebes ba atleta defisiente sira nia prestasaun, tanba iha mundu konta ona
Timor-Leste nia susesu iha lista desportivu nian”, Maria Angelica Sarmaneto ba
jornalista sira hafoin hasoru malu ho ekipa atleta defisiente sira ne’ebé
akompaña hosi Governu liuhosi Sekretariu Estadu Juventude no Desportu (SEJD),
Nélio Isaac Sarmento.
Maria Angelica husu ba joven sira
seluk atu banati tuir, prestasaun ne’e fó aspirasaun ba ema hotu atu iha
vontade hodi kontribui ba prosesu dezenvolvimentu iha setór desportiva, tanba
Timor-Leste iha ona eroi ba desportu nian no múzika, entaun presiza dezenvolve
di’ak liután.
Tanba ne’e, PN hanesan fatin
konsertasaun polítika, hakarak ka lakohi tenke fó apoiu polítika, morál no
finanseiru ba atleta Timor-Leste nian atu bele dezenvolve di’ak liután.
“Apoiu finanseiru katak
parlamentu tenke fó hanoin ba governu atu tau prioridade orsamentál atu
dezenvolve setór desportu, liuliu oinsá mak orsamentu sira ne’e bele kria
kondisaun mínimu, hanesan edifísiu ba treinu, alimentasaun, disiplina no fó
koñesimentu akadémiku liuhosi teoria no prátika atu iha balansu ba atleta
sira”, esplika.
Hodi hatutan ne’e
responsabilidade PN nian atu asegura katak verba sira iha Orsamentu Jerál
Estadu (OJE) liuliu ba setór juventude no despostu tenke fó atensaun ka fó
prioridade, nune’e oportunidade ba joven sira bele esplora sira nia poténsia
ne’ebé iha atu partisipa no kompete iha nivél nasionál no internasionál.
Iha fatin hanesan, Governu
liuhosi Sekretariu Estdu Juventude no Desportu, (SEJD), Nelio Isaac Sarmento,
salienta atleta defisiente sira ne’ebé konsege hetan prestasaun di’ak no lori
medalla osan mean rua iha Asean Games inspira ka fó atensaun ba orgaun Estadu
no sosiedade sivíl, katak oinsá mak atu tau hanoin hamutuk dezenvolve
modalidade desportu, la’os de’it ema ho defieinte maibé ema hotu.
Tanba ne’e, governante ne’e
kompromete sei fó atensaun ba atleta defisiente sira hodi kria kondisaun atu
bele fasilita atleta sira hodi treinu.
“Kondisaun hanesan fasilidade
hodi utiliza ba treinu, kampu hodi treinu, liuliu governu fó atensaun maka’as
hodi prevee osaun iha fundu infraestrutura nian”, tenik.
Entretantu, atleta defisiente,
Teofilo Freitas gaña vitória hodi hetan “medalla de ouro” ka medalla osan mean
rua inklui atleta feto, Pascoela dos Santos Pereira, lori ho bronze ida.
Jornalista: Zezito Silva | Editora:
Rita Almeida
Sem comentários:
Enviar um comentário