Prezidente Repúblika Konsulta KSDS Ba Mandatu Lere

DILI, (TATOLI) – Prezidente Repúblika, Francisco Guterres Lú Olo, konsulta hanoin ho membru Konsellu Superiór Defeza no Seguransa (KSDS) kona-ba rekondusaun ka hapara mandatu Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, no nomeasaun Xefe Estadu Maior F-FDTL.

Konsultasaun opiniaun ne’e hala’o iha Palásiu Prezidente Nicolau Lobato, Bairru Pité, Dili, tersa ne’e.

Majór Jenerál Lere Anan Timur asumi mandatu durante tinan haat hahú hosi 2015 liu-ba no kada tinan rekondus ka ezonera depende ba proposta hosi Governu no depende mós ba Prezidente Repúblika nia desizaun.

Governu aprezenta ona proposta ba Xefe Estadu atu tetu mandatu Xefe Estadu Maior Jenerál F-FDTL nomós aprezenta Koronél Koliati atu asume kargu Xefe Estadu Maior F-FDTL, troka Brigadeiru Jenerál Falur Rate Laek, ne’ebé antes ne’e asume kargu refere.

Xefe Kaza Militár Prezidénsia Repúblika, António Soares da Silva “Maucalo”, esplika membru Konsellu Superiór Defeza no Seguransa laiha kompeténsia atu obriga Prezidente Repúblika deside rekondus ka ezonera no aseita ka rejeita mandatu ida maibé fó hanoin de’it ba PR katak tenke iha Xefe Estadu Maior Jenerál ida no Xefe Estadu Maior ida para tau matan ba F-FDTL, maibé Xefe Estadu maka iha kompeténsia atu desidi.

“Membru Konsellu Superiór Defeza no Seguransa fó opiniaun katak atu nomea no ezonera ne’e kabe ba Prezidente Repúblika”, Maucalo afirma.

Jornalista: Xisto Freitas | Editora: Rita Almeida

Imajen: Enkontru konsultasaun opiniaun membru Konsellu Superiór Defeza no Seguransa (KSDS) kona-ba rekondusaun ka hapara mandatu Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur no nomeasaun Xefe Estadu Maior F-FDTL. Imajen Mídia PR