Demonstrasaun Anti Sosa Karreta Ba MPN, PDHJ Identifika PNTL Viola Direitus Umanus

DILI, (TATOLI) - Provedór Direitus Umanus, Jesuína Maria Pereira Gomes, sente lamentavél ba Atuasaun PNTL nian hasoru manifestante sira hosi universitáriu nian, relasiona ho demonstrasaun kontra sosa karreta ba Membru Parlamentu Nasional (MPN).

Nia dehan,  liuhosi atividade monitorizasaun hosi Provedoria Direitu Umanu sira (PDHJ), hatudu katak Atuasaun Polisia Nasionál Timor-Leste (PNTL) nian hasoru manifestante sira, Polisia rabat liu kampus, la iha police line entre manifestante sira ho seguransa.

Indikasaun ida ne’e, tuir PDHJ nia observasaun akontese violasaun ba iha kestaun direitu umanu no governasaun di’ak ho intensaun atu bele prevene violasaun, maibé polisia sira viola nafatin regra sira.

“Asaun PNTL nia Atuasaun ba manifestasaun balun ne’ebé haksoit korta Estrada mak polisia tebe, tuku, basa, fahi ho kilat no ameasa. no tiru gas lakrimojéniu ba manifestante sira iha kampus oin, nune’e mós tama to’o aredór kampus nian,” Provedora Direitu Umanu, Jesuína Maria Pereira Gomes liuhosi komunikadu imprensa ne’ebé Tatoli asesu, ohin.

Haree ba violasaun hosi parte Polisia nian, PDHJ husu manifestante sira atu mantein nafatin pás no trankuilu, Foka ba objetivu manifestasaun nian liga ho sosa karreta foun no rekolla karreta tuan.

Respeita direitu ba onra no privasidade, labele mal trata ema, inklui respeita sidadaun seluk nia direitu atu halo sirkulasaun  iha área ne’ebá.

Husu atu universitáriu kumpre regra manifestasaun no koopera ho seguransa PNTL hodi evita infiltrasaun parte seluk ne’ebé bele estraga objetivu.

Iha parte seluk, veteranu Reis Kadalak ne’ebé fó apoiu ba manifestante sira iha fatin demonstrasaun sente kestionavél tebes bainhira polisia uza arma hodi tama resintu universitáriu nian hodi duni manifestante sira, tuir nia, hahalok ne’e labele akontese, ema iha nia resintu, polisia labele naran tama arbiru.

“Ida ne’e sira la profisionál, piór liu tan mak manifestante ida monu mós polisia ida mai tebe tan,” Veteranu ne’e lamenta.

Antes ne’e, komandante jerál PNTL, Komisáriu Julio Hornay esplika, Atuasaun PNTL ne’e, tanba viola regra manifestasaun.

Júlio esplika lei númeru 1/2006 hateten sé de’it maka halo manifestasaun tenke iha distánsia metru 100 hosi edifísiu órgaun soberania hanesan Parlamentu Nasionál, Palásiu Governu, Palásiu Prezidente no Tribunál Rekursu.

Artigu 7 hosi lei manifestasaun ninian hateten kuandu manifestante viola regra, autoridade seguransa iha podér intervein. Ida ne’e maka PNTL halo, PNTL la halo arbiru.

Jornalista: Zezito Silva | Editór: Manuel Pinto

Imajen: Provedora Direitus Humanus no Justisa, Jesuina Maria Ferreira Gomes. Imajen: Portal Ofisial PDHJ