DILI, (TATOLI) – Relasiona
ho udan, deputadu hosi bankada Partidu Demokrátiku (PD), Adriano do Nascimento,
husu ba governu atu toma atensaun ba populasaun ne’ebé hela besik iha área auto
estrada Suai.
“Foin dadauk mota tun, komunidade
halai ba kompañia Xina nian atu hetan protesaun, governu tenke rezolve lais”,
afirma deputadu Suai oan ne’e ba Tatoli iha uma fukun, ohin.
Nia husu ba governu atu atende
lais ba komunidade, tanba udan la para. “Ha’u la hatene governu atu responde
oinsá, tanba kuandu udan boot tun tan, komunidade la toba ona iha ida-idak nia
uma”.
Observasaun ne’ebé deputadu ne’e
halo iha terenu mak bee nalihun, entaun tama fali iha tunel (ponte okos ne’ebé
kareta liu), hamosu bee nalihun hanesan mota hodi estraga komunidade nia uma.
“Ida ne’e kestaun planeamentu no
estudu viabilidade. Atu dezvia bee oinsá. Auto estrada ne’e falla estudu. Tanba
atu ba rate dalan la iha, ba to’os dalan la iha”, akresenta.
Enkuantu, kestaun kualidade obra,
iha auto estrada ka aspál iha ona ondas, kuandu ita halai maka’as tatidik ona.
Maibé parte ida retensaun porsentu 10 ne’e kompañia sei halo.
Akontesimentu ne’e iha Suku
Labarai, aldeia Meop, postu Zumalai, bee tun tama iha tonel laran hafoin
estraga sasan hotu.
“Situasaun ne’e akontese tanba
auto estrada ne’ebé ateru to’o metru ualu. Hosi foho hun ateru mai, bee ne’ebé
tun hosi foho ne’e atu liu hosi ne’ebé, la iha solusaun, ateru hotu ona, entaun
la iha bee dalan no bee mak buka dalan rasik, entaun ida ne’e mak difikulta bee
tama povu nia uma no nalihun iha estrada hanesan mota”, katak tan.
Estudu kuandu la profundu
akontese duni nune’e. ida ne’e fó impaktu sosiál ba komunidade. Ida ne’e
kestaun estudu. Tanba koalia ida ne’e ita koalia kona-ba estudu jeotékniku,
estudu ambientál, estudu jeolójia, estudu sosiál no estudu bee dalan nian.
Nune’e mós deputadu bankada
Frente Revolusionária Timor-Leste Independente (FRETILIN), Antoninho Bianco,
konsidera konstrusaun auto estrada ne’e di’ak maibé kestaun mak tenke haree bee
fatin atu liu, se la’e povu mak afetadu ba inundasaun.
“Atu halo estrada tenke haree bee
dalan. Governu tenke tau matan atu halo estrada ruma iha área seluk presiza
tetu hotu”, dehan.
Nia halo komparasaun iha Suai
akontese nune’e ona maibé iha Oekusi seidauk akontese buat ida.
Auto estrada Suai atu halo konstrusaun
tenke haree buat barak. Populasaun afetadu iha Zumalai. Ida ne’e natureza
hanorin ukun nain sira kuandu halo sasan tenke rona malu. Rona povu.
Entretantu, xefe bankada Kongresu
Nasionál Rekonstrusaun Timor (CNRT-sigla portugés), Duarte Nunes, dehan ida
ne’e responsabilidade kontratór nian. Tanba prazu ne’ebé mak sira sei asume
tenke hatan hodi rezolve.
Jornalista: Zezito Silva | Editora:
Rita Almeida
Imajen: Imajen hosi FB Loro Mau
Sem comentários:
Enviar um comentário