DILI, 10 maiu 2019 (TATOLI) –
Bankada Frente Revolusionário Timor-Leste Independente (FRETILIN) iha
Parlamentu Nasionál (PN) husu governu atu halo transparénsia ba kontratu
komersiál entre TIMOR GAP. EP ho kompañia CCECC (China Civil Engineering
Construction and Corporation) kona-ba projetu konstrusaun portu iha Beaço,
Viqueque.
Komunikadu ne’ebé TATOLI asesu,
ohin, hosi Bankada FRETILIN mensiona katak, governu liuhosi TIMOR GAP
deside entrega projetu konstrusaun portu iha Beaço ba kompañia CCECC hosi
Xineza, maibé tenke iha transparénsia.
“Estadu Repúblika Demokrátika
Timor-Leste (RDTL) sei selu millaun $943 ba kontratu ida ne’e no empreza Xineza
maka sei halo dezeñu no mós konstrusaun. Bankada FRETILIN nota ho preokupasaun
boot ba prosesu ne’ebé mak Governu ho TIMOR GAP uza hodi halo adjudikasaun ba
prosesu ida ne’e: laiha transparénsia no la tuir sistema aprovizionamentu atu
defende interese Estadu nian.”
Bankada FRETILIN reafirma katak,
esperiénsia uluk nian hatudu beibeik ona katak projetu sira ne’ebé mak halo
subar de’it, la liu hosi prosesu aprovizionamentu, ikus mai sempre hamosu
prejuizu ba Estadu.
Tuir Bankada FRETILIN, projetu
auto estrada (jalan toll) ne’ebé iha Suai, la to’o tinan ida, monu. Projetu
portu temporáriu iha Hera, gasta millaun $14 ho adjudikasaun direta, mós falla.
Tanba laiha transparénsia no laiha indikasaun katak Governu ho TIMOR GAP foti
prekausaun adekuada atu asegura interese Estadu nian, projetu portu Beaço iha
risku boot atu sai hanesan projetu falladu sira seluk.
Bankada FRETILIN ezije Governu
atu aprezenta detallu hotu-hotu husi kontratu ida ne’e ba Parlamentu Nasionál.
“Ita tenke estuda didi’ak
empréstimu hothotu ho atensaun ba viabilidade ekonómika projetu nian no mós
ninia kapasidade atu selu fali dívida sira ne’e. Garantia saida mak Governu ho
TIMOR GAP fó ba kredór sira karik ita labele ona selu dívida ida ne’e?”. FRETILIN mantein firme ninia kompromisu atu asegura transparénsia no boa
governasaun, atu defende Povu no Estadu nia interese.”
Jornalista: Zezito
Silva | Editór:
Francisco Simões
Imajen: Membru Bankada FRETILIN
iha Parlamentu Nasionál. Imajen/Media Bankada Fretilin
Sem comentários:
Enviar um comentário