Kompañia Aérea Xineza Hakarak Investe Iha Timor-Leste

DILI, 24 maiu 2019 (TATOLI) – Kompañia Aérea Xineza ne’ebé antes ne’e halo ona akordu ho Air Timor, hakarak mai investe iha Timor-Leste hodi bele loke voo ba nasaun hanesan Xina, Bali, Hong kong, Bali, Perth no Singapura.

Eis Prezidente Repúblika, José Ramos Horta lori Prezidente Air Timor, Francisco Oliveira no responsável Kompañia Aérea Xineza, hodi hasoru malu ho Primeiru-Ministru Taur Matan Ruak hodi ko’alia saida mak Kompañia Aérea ne’e be’e halo iha Timor-Leste.

“Ha’u akompaña management (jestaun) Air Timor mai hasoru Primeiru-Ministru, ha’u la-hola parte no relasaun komersiál ho sira maibé preokupa ho ita nia difikuldade kona-ba aviasaun ne’ebé folin billete aas tebes,” tenik José Ramos Horta ba jornalista sira iha Palásiu Governu, sesta ne’e.

Tuir eis titulár ne’e, nia buka meius atu tulun governu no durante ne’e nia diskute ona ho kompañia aérea balun bainhira iha oportunidade ba rai li’ur.

“Haree oinsá bele rezolve problema ne’e, tanba Silk Air para ona no ita 100% dependente ba aviaun ne’ebé ladún iha kredibilidade hanesan Citilink no Sriwijaya,” katak eis-xefe estadu ne’e.

Nune’e nia dehan, se nasaun ne’e iha soberanu entaun tenke buka solusaun, nune’e Air Timor halo akordu ho kompañia aérea Xina. “Aviaun foun, Air Timor halo ona akordu no agora hein de’it Governu ninia autorizasaun, para aviaun ne’e bele semo husi Dili- Bali, Hong Kong, Darwin, Perth no Singapura”.

Tuir nia, atu realiza governu tenke iha akordu ho Xina hanesan Air Service Agreement (akordu servisu aérea) ne’ebé normalmente governu ho governu mak halo, hafoin governu Timor-Leste fó autorizasaun ba Air Timor hodi lori prosesu ne’e ba oin.

Tuir Ramos Horta, ajénsia viajen ne’ebé iha la’ós Timor-Leste, reprezenta ajénsia viajen husi Bali nian, tanba ne’e mak billete mós karun.

Nia mós haktuir, aviaun ne’ebé atu mai halo operasaun iha Timor-Leste ho kadeira 134, ualu bussiness class ka klase negósiu no balun economy class ka klase ekonomia, no aviaun ne’e rasik sei foun.

Nune’e mós sira sei harii baze iha Timor-Leste hodi para aviaun ne’e iha Aeroportu Internasionál Nicolau Lobato no sei lori enjeñeiru no tékniku sira hodi halo manutensaun.

“Aviaun prontu atu mai fulan juñu, maibé depende ba governu. Ha’u hatete ona ba Primeiru-Ministru, favór governu book-aan lais”, tenik tan eis-prezidente ne’e.

Tuir nia, dokumentu agora governu ho governu, maibé kompañia prontu atu mai no aviaun iha ona.

Nia haktuir, Xefe Governu rasik sei análiza proposta ne’e no sei bolu reponsável hanesan Minisru Transporte no Komunikasaun hodi haree ba asuntu ne’e.

Jornalista: Julia Chatarina | Editór: Rafy Belo

Imajen: Eis Presidenti RDTL, Ramos Horta. Imajen/Egas Cristovão