sábado, 25 de maio de 2019

AS Ponta Leste Liki SLB 3-2


DILI, 24 maiu 2019 (TATOLI) - AS Ponta Leste susesu hadau pontu tolu hosi ekipa adversáriu AD SLB Laulara iha Jornada Datoluk Liga Futeból Amadora (LFA) ne’ebé hala’o iha Estádiu Munisipál Dili, sesta loraik ohin.

Bainhira jogu primeira parte hahú, ekipa rua lansa kedas kontra atake ba malu tuir tékniku ida-idak nian. Iha jogu nia hahú, SLB domina liu bola. Tan ne’e, lori Mouzinho Barreto de Lima uza kedas oportunidade hodi lansa xutu ba rede Ponta Leste liuhosi bola kalma ne’ebé pasa hosi médiu klubu refere. Esforsu ne’e la saugati. Mouzinho rezulta golu liuhusi biban ne’e iha minutu 7.  Tan ne’e, lori SLB lidera provizóriu rezultadu 1-0.

Mouzinho nia motivasaun hetok aas. Nia kontinua halo golu. Hakat ba minutu 31, nia hetan oportunidade hodi lansa tan golu ida hodi muda rezultadu ba 2-0 to’o primeira parte ramata laiha tan golu ruma mak akontese hosi parte rua.

Tátikamente, iha jogu segunda parte, klubu istimadu hosi Munisípiu Aileu ne’e kontinua halo ahi. Domina nafatin bola hodi sadik klube ne’ebé treinu hosi treinadór Eduardo Pereira. Sadik no sadik hela maibé la rezulta golu.

Entretantu, treinadór AS Ponta Leste la nonók leet. Hosi kampu nia ninin, haree ninia liman book-án hanesan direjente koru dirije koru. Liman baku ba sorin karuk no sorin loos. Nia orienta ninia jogadór sira. Orienta ba dalan loos. Orientasaun ida ne’e, lori jogadór Ponta Leste halo mudansa ba estratéjia. Sira uza estratéjia hamate bola. Estratéjia ida ne’e halo SLB atrapalladu. La hetan bola.

Tanba ne’e, iha minutu 62, Silvero Garcia uza oportunidade mamuk iha liña oin SLB nian hodi lansa kedas xutu ba rede SLB. Xutu ho alvu. Nia (Garcia) konsege muda rezultadu jogu hosi 2-0 ba 2-1. Rítmu jogu hahú tensa. Jogadór SLB joga ho ofensiva. Hakarak hasa’e sira nia pontu. Maibé, jogadór Ponta Leste la fó fatin. Sira (jogadór Ponta Leste) joga ho kalma. Kontinua hamate bola no iha oportunidade sira mós halo ofensiva.

Tátika ida ne’e, lori sira hetan oportunidade luan. Aproveita bola barullu maka’as iha rede SLB nia oin, jogadór estranjeiru, Daniel Donkor, hiit bola ho kalma ba Silveiro Garcia no Silveiro konsege ezekuta ho susesu. Hatama duni golu liu hosi kabesa iha minutu 72. Rezultadu sai 2-2.

Haree ba golu ida ne’e, loloos SLB tenke badinas liu-tan, maibé la akontese. SLB nia rítmu jogu tún ba beibeik. Aproveita sira-nia rítmu ne’ebé monu, Ponta Leste kontinua lees sira nia guarde rede. Iha minutu 74, jogadór estranjeiru ho nasionalidade Gana, Veh Donald, hetan bola hosi nia amigu Daniel Donkor, marka kedas ba rede SLB no rezulta golu. Rezultadu ida ne’e, lori Ponta Leste vense klube ne’ebé lidera hosi Kay Rala Xanana Gusmão ho pontu 3-2.

Vitória ida ne’e, lori Ponta Leste lidera provizória tabela klasifikasaun ho pontu 9, SLB tún fali ba túr iha pozisaun datoluk ho pontu 4. Entretantu, Boavista Clubu de Timor okupa iha pozisaun daruak ho pontu 7, Assalam FC okupa iha pozisaun dahaat ho pontu 4, Lalenok FC okupa iha pozisaun dalimak ho pontu 3, Karketu FC okupa iha pozisaun da-neen ho pontu 1, Académica FC ho Ultramar okupa iha liña dezpromosaun tanba ho pontu mamuk.

Iha biban ne’e, Treinadór AS Ponta Leste, Eduardo Pereira hateten ninia ekipa hetan vitóri tanba liuhusi mudansa estratéjia urjente.

“Rezultadu ohin ne’e halo ha’u kontente loos, tanba ami bele manán. Loloos ne’e, SLB mak manán tanba jogadór sira nian ne’e kaer malu metin tebes nune’e iha primeira parte sira lidera uluk jogu,” nia haktuir  hafoin jogu ramata iha Estádiu Munisipál Dili, ohin loraik.

Aleinde ne’e, nia husu ba arbitú sira atu lidera jogu di’ak liu-tan nune’e labele mosu konflitu iha kampu laran.

“Ho haraik-an atan ha’u husu ba ita-nia arbitú sira kuandu hú ne’e tenke haree didi’ak, nune’e ita bele lori futeból ne ba oin ho di’ak,” nia sujere.

Iha fatin hanesan, kapitaun SLB Laulara, Nídio Ricardo dehan, derrota ne’ebé nia ekipa hetan falla hosi sira nia defeza ne’ebé ladún kontrola bola ho di’ak.

“Ami nia defeza mak ladún kontrola bola ho di’ak. Iha primeira parte ami domina loos bola hodi ami lidera uluk 0-2, maibé iha segunda parte ami nia liña koordenasaun la’o ladi’ak ona nune’e lori ami tenke lakon,”  nia tenik.

Jornalista: Mídia LFA | Editór: Xisto Freitas

Imajen: Jogadór AS Ponta Leste no AD SLB hadau malu bola. Imajen Mídia LFA

Sem comentários: