Aitahan Matak Sente Ameasadu, Fila ba ‘Abrigu’

DILI: Hafoin membru Falintil Forsa Defeza Timor-Leste (F-FDTL) halo vizilansia iha sede nasional Rezistensia Nasional Defende Justisa no Konstituisaun RDTL (RNDJKRDTL), Antonio Aitahan Matak mós hanesan lakon.

Molok ne’e, mosu gravasaun lian iha media sosial lian hanesan husi Aitahan Matak. Iha gravasaun ne’e Aitahan Matak koalia kona-ba razaun kansela manifestasaun kontra Prezidente Repúblika Francisco Guterres Lú Olo.

Lian ne’ebé deskonfia nu’udar lian Aitahan Matak, duun mós parte igreja no partidu politiku balun mak sai autór hodi hamosu grupu RNDJ-KRDTL.

Ikus mai, bainhira jornal INDEPENDENTE koko halo konfirmasaun ho Aitahan Matak via telefone, Aitahan Matak dehan, daudauk ne’e nia iha ameasa nia laran, tanba ne’e labele halo intervista.

“Ha’u iha tiha ona kompremidu nia laran, ameasa nia laran, la halo intervista, to’o tempu mak imi foin rona ha’u-nia lian,” dehan Aitahan Matak, Segunda (07/09).

Maske nune’e, Aitahan Matak konsege hatan asuntu balun relasiona ho razaun kansela manifestasaun.

“Kona-ba Angela kansela nia manifestasaun ida ne’e husu ba Lere, nusa imi la husu sira na’in lima ne’e, agora ha’u (Aitahan Matak) temi sira na’in neen nia naran atu imi ba halo intrevista.

Ida Xanana Gusmão, Ramos Horta, Marí Alkatiri, Taur Matan Ruak, Lú Olo no mós Lere Anan Timur, sira na’in neen lori ona Timor iha Portugal nia okos ka Timor ukun aan? imi ba husu ida ne’e,” dehan nia.

Entretantu, iha sede nasional RNDJ-KRDTL, Bairo Formoza, Angela Freitas hahú sadik Xefe Estadu Maior F-FDTL, Maijor Jeneral Lere Anan Timur.

"Se ita-boot (Lere) brani hanesan ema ida ne'ebé lidera instituisaun F-FDTL, tempu to'o ona (kaptura) Mari Alkatiri, ida ne'e mak hatudu ba mundu katak ema ne'ebé durante ne'e halo Timor-Leste la hakmatek mak Marí Alkatiri, la'ós Angela Freitas," dehan Angela.

Nia dehan, atuál Sekretáriu Jerál partidu Fretilin Marí Alkatiri mak sai alvu dahuluk halo TL la hakmatek.

"Se ha'u mak ukun rai ida ne'e, Marí Alkatiri mak ha'u kaptura uluk, tanba saida mak durante ne'e sira la kaptura Marí Alkatiri, ema ne'ebé uma-lisan laiha, depois mai iha rai ida ne'e hodi sobu ita-nia unidade nasionál, unidade lidér nasionál nian, F-FDTL ne'ebé iha 2006 fahe kilat ba sivíl sira no agora soran nafatin povu."

“Grupu skylight ne'ebé durante ne'e iha ita-nia rai hodi sobu ita ne'e Marí Alkatiri mak lidera, entaun ema ne'e mak iha kapturasaun imediata, kuandu kaptura ona rai ne'e hakmatek, tanba saida mak durante ne'e sira la halo kapturasaun ba Marí Alkatiri? Ema ida de'it ne'ebé destroi nasaun ne'e husik livre de'it hodi kontinua halo problema,” dehan nia.

Angela mós hatan deklarasaun Lere ne’ebé hatete katak nia mak sai asesóra ba Alfredo Reinaldo no Mauk Moruk.

Portavoz RNDJ-KRDTL ne’e dehan, Lere nia deklarasaun ne'e laiha fundamentu, tanba iha momentu ne’eba laos Angela mak lidera instituisaun F-FDTL.

“Dehan maijór Alfreido mate ne'e ha’u (Angela) mak envolve, ne'e la loos, tanba momentu ne'ebá lidera instituisaun F-FDTL ne'e la'ós ha’u, maibé atuál Primeiru Ministru Taur Matan Ruak, depois Mauk Moruk mate ne'e Jenerál Lere Anan Timur mak lidera F-FDTL, tanba ne’e see mak lidera instituisaun F-FDTL ne'e tenke responsabliza mate sira ne’e,” dehan Angela.

Nia husu ba Lere atu labele tuda fauk subar liman, maibé tenke toma responsabilidade nu’udar lideransa F-FDTL.

“Jenerál Lere nia deklarasaun ne'e laiha fundamentu no laiha responsabilidade nu'udar lideransa ne'ebé lidera instituisaun F-FDTL, tanba ne'e ami prepara ona dokumentu sei lori ba Ministériu Públiku tanba ne'e para ona ho akuzasaun falsu sira ne'e."

“Jenerál Lere dehan ha'u mak asesora ba Alfredo no Mauk Moruk ne'e la loos, tanba ne'e ha'u husu señor Lere tenke iha provas, nu'udar lideransa másimu iha F-FDTL la'ós halo hanesan fahi fuik tama toos, se sente lidera F-FDTL kole ona, haree ba futu manu, husik jerasaun foun mak lidera fali, ne’e duni tempu badak ami sei lori jenerál Lere Anan Timur ba MP, agora ami-nia advogadu sira prepara hela faktu sira," dehan nia.

Cristina Ximenes | Independente