DILI, STLNEWS.co – Timor Leste (TL) tenke prepara ninia produtu, atu bele halo exportasaun ba merkadu internasional, no labele depende deit ba importasaun husi liur. Kestaun nee, hatoo husi Diretor Jeral Comersiu, Cosme Fatima da Silva.
TL prepara hasae ninia produsaun iha rai laran, atu nunee bele exporta ba rai liur, tanba dadaun nee merkadu internasional sira gosta produtu lokal TL nian, maibe bainhira atu exporta, tenke hasae uluk produsaun, para bele exporta ba rai liur, tanba durante nee,TL sei depende ba iha importasaun neebe mai husi liur.
“Nee los duni katak, agora merkadu Xina no Uniaun Europeia loke sira nian merkadu ba produtu lokal TL ninia, tanba Uniaun Europiea servisu hamutuk ho MTCI, para emprezariu TL bele exporta produtu TL, neebe mak liu husi sistema online, agora sira merkadu presiza ita nian produtu TL, nee siqnifika ita TL tenke produs buat neebe merkadu rua nee presiza, espriensia durante nee hatudu mai ita katak, dala barak emprezariu sira husi Uniaun Europeia, no emprezariu husi Xina, neebe husu produtu mai ita, ita laiha produtu atu halo exportasaun ba too iha neeba,” dehan Diretor Jeral Comersiu ba STL iha Acait Dili.
Nia dehan, TL tenke prepara ninia produtus, atu nunee bele halo exportasaun ba rai liur. Koalia konaba exportasaun, maibe TL depende liu ba iha importasaun neebe mai husi liur, agora infrenta situasaun Covid-19, neebe ataka mundu tomak, no nasaun ida-idak preokupa tebes ninia ekonomia iha rai laran.
“Ita TL mos preokupa ita nian ekonomia iha rai laran, tanba nee importante duni, no iha duni nesesidade estratejika para emprezariu sira nee involve direitamente involve povu agrikultor sira, atu nunee sira bele produs, nomos ita nian emprezariu sira mak bele prosesa ou lori produtu nee ba iha merkadu internasional,” dehan nia.
Iha fatin la hanesan, Ofisial programa AJAR, Inocencio de J.Xavier, dehan, agora dadaun povu agrikultor barak husik ona sira nian toos no natar, maske rai iha munisipiu nee bokur diak para hasae produsaun, maibe se ema la halo toos no natar, oinsa mak atu bele hasae produsaun iha rai laran, ho ida nee too ohin loron TL sei depende bebeik ba sasan importasaun,ho ida nee TL sai hanesan nasaun konsumidor.
“Ita sei depende bebeik ba importasaun, tanba ita nian produsaun rai laran menus, oinsa mak ita labele depende ba importasaun, depois ita nian traktor balun kondisaun aat, iha fatin balun irigasaun aat seidauk hadia, se ita nian governu la prepara kondisaun neebe mak diak ba povu agrikultor sira, oinsa mak sira atu dezenvolve setor ida nee ho diak,” tenik nia.*
Suara Timor Lorosae | Reportajen: Jacinta Sequeira/Madalena Horta | Editor: Ekipa STL
Imajen: Timor Leste (TL) tenke prepara ninia produtu, atu bele halo exportasaun ba merkadu internasional, no labele depende deit ba importasaun husi liur. Kestaun nee, hatoo husi Diretor Jeral Comersiu, Cosme Fatima da Silva. (Foto Ilustrasaun: Asia Commerce)
Sem comentários:
Enviar um comentário