TRIBUNAL REKURSU REZEITA PEDIDO EMILIA

DILI - Tribunal Rekursu (TR) la aprova pedidu husi arguida Emilia Pires hodi rezeita hotu rekursu neebe mak tau iha autos.

Tuir fontes konfirmadu neebe lakohi temi naran ba diario nee hatete katak, pedidu neebe mak arguida Emilia Pires temi iha rekursu, tribunal rekursu la hatan hotu kedas. Tanba neemak tribunal rekursu hatun ona desizaun hodi haruka mai iha tribunal distrital Dili hodi bele halao ona prosesu julgamentu ba arguida Emilia Pires ho Madalena Hanjam.

Iha parte seluk Presidenti Tribunal Rekursu Guilhermino da Silva hatete, rekursu neebe mak hatama desizaun tun tiha ona no hein tribunal Dili atu halo julgamentu ba prosesu nee. Nunee nia parte seo la halo komentariu beibeik, tanba lei bandu atu komentariu bebeik.

Hau hanoin ida imi husu bei-beik hau labele koalia beibeik tamba lei bandu atu komentariu beibeik tenknikamente hau seidauk koalia ba buat nee maibe iha regras neebe agora ita akompaina deit prosesu nebe halao iha tribunal Dili atu ba julgamentu ita hein deit julgamentu no rejultadu. Neebe ita labele koalia dehan hanesan nee ou hanesan neeba, nee ladiak tamba iha prosesu juiz labele komentariu beibeik. Iha prosesu hau koalia enzeral deit, hau foka ba teknikamente prosesu nee ninian,” tenik nia.

Antes nee Tribunal Distrital Dili, iha loron 23 de Marsu 2015 adia hikas prosesu audensia julgamentu ba arguida Emilia Pires ho Madalena Hanjam ba kazu krime partisipasaun ekonomio em negosiu tuir artigu 299 kodigo penal Timor Leste, tanba sei hein desizaun husi Tribunal Rekursu kona ba arguida Emilia nia rekursu. Informasaun kompletu iha STL jornal no STL Web, edisaun Sesta, (8/5/2015). Domingas Gomes/Timotio Gusmao

Suara Timor Lorosae