VICENTE MAUBOCY “ATAKE” XANANA - ALKATIRI

Dili, Vicente Maubocy, Vice Prezidente Partidu Frenti Mudanca hahu kampanye eleitoral ba 2017 ho atake hasoru Prezidente Partidu Conselhu Nasional Rekonstrusaun de Timor (CNRT), Kay Rala Xanana Gusmao no Sekretariu Jeral Fretilin, Mari Alkatiri.

Maske kampanye eleitoral ba eleisaun jeral 2017 seidauk hahu, maibe iha intervista ne’ebe Vicente Halo ho reporter Centru Jornalista Investigativu Timor Leste – CJITL (27/4) komesa atake lider partidu seluk hanesan Xanana ho Alkatiri.

“Frenti Mudanca sei plano atu kria fatin edukasaun nian iha teritoria tomak no mos sei atrai povu ida ne’e ba moris diak,hau senti Xanana ho Mari nunka hanoin ida ne’e” Maubocy hateten.

Tuir nia katak, edukasaun mak bele fo moris diak ba povu. “Primeiro  povo tenki moris diak tamba to’o oras ne’e la iha ema ida maka bele atu tau matan ba povu doben Timor Leste, edukasaun mak dalan ba povu moris diak”.

Frenti Mudanca Iha Krize

Iha parte seluk, CJITL iha hela prosesu atu konfirma krize ne’ebe akontece iha partdu Frenti Mudanca nia laran hafoin Jorge Teme fila ba Parlamentu Nasional hodu hadau hikas kargu deputado husi Maria Adolzinda ne’ebe durante ne’e subtitui iha uma fukun.

Bainhira reporter CJITL halo konfirmasaun ho Eis Deputada Frenti Mudanca, Maria Adolzinda iha nia servisu fatin, Akait, Dili, haktuir katak nia labele hateten sai razaun saida mak Jorge Teme ba hadau kargu refere.

“Diak liu imi ba husu ba Sr. Vicente Maubocy ho Sr. Victor da Costa, buat politik ne’e resiko mak hanesan ne’e ona,”Hateten Eis deputada ne’ebe oras ne’e sai hela asesora ba Ministru Kordenador no Ministru Agrikultura no Peskas, Estanislao Aleixo da Silva.

Bainhira CJITL halo konfirmasaun ho Vicente Maubossi, nia sujere atu CJITL kontaktu direita ho Prezidente Partidu, Jose Luis Guterres.

Maske nune’e, to’o noticia ne’e hatun CJITL seidauk konsege halo konfirmasaun ho Jose Luis tamba sei halo vizita privado ba Indonezia.

Jorge Teme foti hikas fali kargu deputado hafoin nia rejeita atu tama iha estrutura VI Governu Konstitusional ho razaun ideologia partidu.

Teme rasik antes ne'e servi iha V Governu hanesan Ministru Administrasaun Estatal no Ordenamentu Teritoriu (MAEOT) no iha estrutura governu foun, Xanana Gusmao muda tun ba Vice Ministru no nia kargu entrega fali ba Sekretariu Jeral CNRT, Dionisio Babo.

Iha Minutu ikus pose nian, Teme rejeita atu simu oferta ne'e hodi fila ba parlamentu "hadau" hikas pozisaun ne'ebe nia rasik entrega ona ba Deputada Maria Adolzinda iha Augusto 2012. (Cosme &Venancio/CJITL

CJITL