PM RUI BANDU KFP FAMILIARIZMU

Primeiru Ministru (PM), Rui Maria de Araújo bandu maka’as Komisaun Funsaun Públika (FKP) atu labele hili familia deit ka familiarizmu iha prosesu rekrutamentu funsionáriu públiku nian hodi hamosu Korupsaun, Koluzaun no Nepotismu (KKN).

Lia fuan ne’e hateten husi PM Rui Araújo bainhira asiste termo de entrega husi prezidente KFP tuan Liborio Pereira ba iha nia troka, Faustino Cardoso (10/6) iha Edifisiu KFP.

“Ha’u hakarak dezeja dala ida tan votus servisu diak no korazen, com serteza depois ema sei telephone ba ita bo’ot sira katak, haree lai ha’u nia primu ida ne’e no ha’u nia prima ida ne’eba, maibé ha’u fiar katak, ita bo’ot sira iha integridade no iha rezistensia atu kontra tentasoens sira ne’e hotu, tanba ita nia objetivu mak atu servi ita nia nasaun no ita nia povu,”dehan PM Rui Araújo iha nia diskursu ba seremonia transferensia poder refere.

Rui Araújo afirma, KFP tutela iha Gabinete Primeiru Ministru nia okos, maibe Governu sei la interven iha servisu KFP nian, ne’e KFP nia kompetensia rasik atu jere.

Xefe Governu ne’e dehan, sestu Governu konstitusional ninia programa importante ida mak introdus reforma iha administrasaun públika.

“Ita atu halo reforma ba administrasaun públika, ita tenki iha motor ida ba reforma. Motor ida ba reforma ne’e mak, Komisaun da Funsaun Públika,” katak Rui Araújo.

Tanba ne’e, importante tebes tenke iha apoiu politika ba planu ida ne’e. iha biban ida ne’e PM agradese servisu tomak ne’ebé Prezidente tuan KFP, Liboriu Perreira ho nia ekipa halo.

“Maibé klaru katak, hanesan mós ita ema, wainhira ita moris to’o bo’ot, ita nia forma ne’e muda, roupa ninia dividas mós tenke muda, nomos agora ho modelus ne’ebé mosu iha fatin-fatin, ita mós tenki adapta ba modelu sira ne’e, ida ne’e mak konseitu reforma,”tenik Rui Araújo.

Tuir Rui Araújo, konseitu reforma ne’e, la’os mai atu hasai deit buat ne’ebé mak ladiak, maske klaru katak tenke hasai duni buat ne’ebé mak ladiak hodi ajusta ba dezenvolvimentu Timor Leste ne’e.

Iha parte seluk, Prezidnete KFP foun, Faustino Cardozo promote, nia ho nia ekipa sei hala’o servisu ho rigor, efikas no nakonu ho responsabilidade.

“Ida ne’e prosesu ida que hatudu ita nia sentidu Estadu, sentidu responsabilidade, wainhira ita assume kargu iha instituisaun Estadu nian saida deit,” dehan Faustino Cardozo.

Nia hatutan, kargu ne’e buat ida ne’ebé publik, tanba Timor Leste Estadu Repúblika, entaun se deit mak priense rekezitus no hetan fiar, tenke prontu atu ba assume responsabilidade ida ne’e.

Faustino dehan, konstituisaun TL mós, define ona prioridades kona-ba kontestu hotu, iklui Komisaun Funsaun Públika nian.

Faustino haktuir, tuir lolos serimonia entrega poder ne’e hala’o iha loron Trerça (2/6), maibe tanba saudozu Fernando LA Sama de Araujo nia mate entaun tenki kansela.

Serimonia entrega poder ne’e simples liu tanba mandatu ne’ebé Estadu fó ne’e mos simples, tanba ne’e ho prezensa PM Rui Araújo sai testamuña direita ba prosesu transferensia responsabilidade simples ne’e.

“Ami hala’o ona vizita ba Sekertariadu, halo komunikasaun mós ho Diretores Jerais, inspetur, Xefe Departamentu, halo mós vizita ba edifisiu foun ne’ebé infinitivu hela diet, INAP no hau fó ona despaixu barak tiha ona, i ami hetan ona ideia kona-ba situasaun espasu ninian,” relata Faustino.

Iha okaziaun ne’e, Faustino husu ba Gabinete Primeiru Ministru atu servisu hamutuk hodi hadia funsaun públika, hodi ikus mai bele alkansa objetivu funsaun públika ida efisiente, efikas, responsavel ho prestaun servisu ne’ebé ho kualidade.cos

Jornal Nacional