2016, REHABILITA PORTU DILI

Governu tau ona planu prioridades iha tinan 2016 ne’e tenke rahabilita kondisaun Portu Dili.

“Kondisaun Portu Dili ladun diak, foin dadaun ami atu hatama iha planu, maibe haree fali ba Governu nia posibilidade maka adia hela, mais to’o tinan 2016 ami sei halo rehablitasaun ba Portu Dili,” informa Direitor Portu Dili, Lino Barreto ba Jornalista iha nia kna’ar fatin Portu Dili, Kuarta (10/06/2015).

Iha parte seluk Prezidente komisaun E Parlamentu Nasional (PN), trata asuntu infra-estrutura, Pedro da Costa, kestiona katak, Portu Dili ne’e presiza halo rehablitasaun, maibe bainhira atu halo rehablitasaun presiza halo estudu ne’ebe mak klean, tanba to’o ona tempu duni atu rehablita Portu Dili.

Membru komisaun E PN, husi Bankada FRETILIN, Deputada Anastacia da Costa realsa mos katak, presiza duni halo rehablitasaun ba Portu Dili, maibe antes atu halo rehablitasaun tenki halo preparasaun ida ne’ebe mak masimu.

“Komisaun Infraestrura nian hanoin katak presiza duni ita tenki halo rehablitasaun ba Portu Dili, mais antes atu halo rehablitasaun tenki halo preparasaun ida ne’ebe mak masimu, hodi haree dezenhu ho BoQ ne’ebe mak iha no presiza halo estudu ne’ebe mak diak atu nune’e bele hetan portu ne’ebe mak ho kualidade ba ita nia rain,” hateten Deputada Anastacia. mia

Jornal Nacional