EOK Simu Karta Hosi Familia Luis Ramos, Governu Tenke Tau Matan Faluk Oan Kiak

DILI - Komandu Empenhamento Operasaun Konjunta (EOK) simu ona karta hosi familia Vitima Luis Ramos, oinsa atu tau matan ba faluk no oan kiak sira, tamba vitima mate fo nia kontribuisaun ba Operasaun Konjunta neebe halao.

Tuir Vice Xefe Estadu F-FDTL Brigaderu Jeneral Filomino Paixao katak, EOK simu ona karta ida hosi familia Vitima Luis Ramos, neebe husu EOK atu toma responsablidade ba faluk no oan kiak sira, no surat nee iha EOK nia liman no sei estduda hamotuk ho Ministru Interior no Defeza.

Ami simu ona surat nee hosi familia vitima sira, maibe ami tenke tun hamotuk ho parte Governu nian, liu liu Ministru relevante neebe maka toma responsablidade ba Asuntu siguransa no defeza oinsa atu fo apoi ba sira, no apoiu nee ho tempu badak ka naruk, tamba nee ami sei deskute hamotuk, tamba desizaun final nee sei mai hosi politik nain sira maka bele desida apoiu nee atu lao too tempu naruk la ou tempu badak,” dehan Paixao, liu hosi konferensia Imprensa, Sesta (10/07/2015) iha Kuartel Jeral FDTL- Fatuhada Dili.

Nia informa, EOK labele foti desizaun mesak tan nee maka karta nee sei deskute hamotuk ho Governu, oinsa atu buka solusaun, tamba desizaun hotu hotu tenke mai hosi Politik nain sira, tan nee EOK labele foti desizaun mesak, maibe fiar katak sei tau matan ba faluk no oan kiak sira moris.

Iha fatin hanesan Caetano Alves hanesan peskijador hosi ONG fundasaun Mahein hatutan, EOK hamotuk ho Governu tenke toma responsablidade ba komunidade inosente neebe la hatene buat ida. Informasaun kompletu iha STL jornal no STL Web, edisaun Sabado (11/7/2015). Madalane Horta/Sonia Fereira

Suara Timor Lorosae