PNTL KAPTURA EMA 42 FA’AN KUPON SDSB ILEGAL

Polisia Nasional Timor leste (PNTL), liu husi Unidade Servisu Investigasaun Kriminal Nasional (SIKN), Sabado (11/07), mais ou menus tuku 18:00 OTL desloka ba Munisípiu Liquiça hodi kaptura ema nain 42 ne’ebe maka fa’an SDSB ilegal.

“Sim, porvolta tuku 18:00 OTL, polisia investigasaun Kriminal, desloka ba Munisípiu Liquiça Vila, hodi detein ema 42 pesoas. Sira ne’e servisu investigasaun to’o iha ne’eba sira sei hala’o hela aktividade Jogos ilegais, lotaria ilegal ka SDSB,”haktuir Komandante Operasaun Interino, Superintendente Xefe Mouzinho Coreia ba jornalista sira iha Kuartel Jeral PNTL Kaikoli, Domingo madrugada (12/07), hafoin fila husi operasaun.

Nia haktuir, ema nain 42 refere dadaun ne’e detein hela iha sela polisia hodi submete ba prosesu investigasaun, depois halo investigasaun maka sei determina nain hira maka halo distribuisaun kupon, no nain hira maka hola kupon hodi klasifika tuir idak idak nia kualidade.

Tuir Mouzinho katak, rezultadu investigasaun to’o segunda maka foin bele hetan rezultadu finalidade.

Nia informa mos, polisia iha evidensia neebe maka liga direita ba iha jogus ilegais, ixemplu hanesan kupon mutin kosidenra ilegais, hamutuk ho osan ne’ebe maka mai husi fa’an kupon tanba ne’e polisia konsege prende osan ho kupon.

Nia haktuir katak, polisia to’o iha fatin patraun lotaria illegal ne’e halai sai husi fatin, maibe polisia sei kontinua tenta hodi halo aproximasaun hodi lori ba hatan ba justisa.

Tuir komandante katak, nain lima ka nain 6 depende ba prosesu investigasaun, liu liu ba sira ne’ebe maka distribui kupon lotaria mutin sei hela hodi ba hatan iha tribunal ba sira ne’ebe maka hola sei fila.

Fatin ne’ebe maka patraun lotaria illegal ne’e aluga iha liquiça Vila. Ema hirak ne’e husi Dili maka halai ba ne’eba i nomos fatin seluk ne’ebe maka sei halo atuasaun. eus

Jornal Nacional