FALSIFIKA DOKUMENTUS BA SUBSIDIU, ESTADU SEI LORI BA TRIBUNAL

Prezidente Komisaun Homenajen, Virgilio Smith informa katak, dadauk ne’e Estadu hamosu ona politika foun ida atu ema ne’ebé hakarak falsifika dokumentus hodi hetan subsidiu husi Estadu, tenke responsabiliza nia hahalok ne’e iha Tribunal.

Nia hatutan, ba futuru mak Servisu Komisaun Homenajen nian, detekta ema ruma falsifika dokumentus hodi manobra osan Estadu, sira sei lori ba Tribunal hodi buka lia los.

“Durante prosesu validasaun ne’e, ita hetan ema halo falsifikasaun dadus barak. Ha’u atu informa deit katak, iha ultimo verifikasaun ne’ebé ami halo iha 2014, ami kansela tiha lubuk ida, tantu ba sira ne’ebé mak mate no sira ne’ebé mak moris. dadauk ne’e ita iha ona planu ida katak, iha prosesu berifikasaun de dadus mak detekta iha ema ruma falsifika dokumentus hodi hetan subsidiu husi Estadu, Komisaun Homenazen sei lori ba Tribunal,”dehan Virgilio Smith iha Palasiu Governu, Sesta (10/7), hafoin tomada de posse ba Komisarius foun Komisaun Homenajen nian.

Nia hatutan, durante ne’e, sira kansela ona ema barak ne’ebé hetan ona sub-sidiu husi Governu tanba falsifika dokumentus, maibé ema sira ne’e lori fali Estadu ba Tribunal.

“Sira ne’ebé ita kansela, sira lori ita ba Tribunal, prosesu iha Tribunal ema kondena Komisaun Homenazen. Maibé iha kazu lima mak, Ministériu Públiku fó sai katak, Komisaun de Homenazen la sala tanba iha razaun,”katak Virgilio.

Nia hatutan, la’os ema falsifika dokumentus deit, maibé iha ema balu mak lori komisaun nia naran, hodi ba bosok veteranus sira atu hetan osan. maibé Virgilio dehan, ema sira ne’e, komisaun konsege remete ona ema id aba tribunal.

“Ha’u informa ba Primeiru Ministru katak, total rejistu iha 2003 ninian, 76 mill i 78 rejistus, no segunda rejistu iha tinan 124 mill i 3 rejistus. ne’ebé total rejistus husi 2003 no 2009 mak, 200 mill i 71 rejistus,”relata Virgilio Smith.

Nia esklarese, Komisaun Homenazen agora daduk ne’e, konklui dadauk ona ho rejistu 2003 nian, husi rejistus 76 mil ne’e, to’o agora ema ne’ebé hetan balidadu ona, hamutuk 7.500. sira ne’ebé mak eskulidus hamutuk 1.250 rejistus.

Sira ne’ebé benefisiarus ba pensaun, to’o agora hamutuk 18. 938 pesoas. Virgilio dehan, husi benefisiarius sira ne’e, tinan 8 ba leten hotu.

“8 a 14 ne’e, ba sira idozus i difisientes nomós sira kombatentes 8 a 14 hotu. Depois 15 a 19 eskalaun 2 espesial de reforma, 20 a 24 eskalun 1, ne’e mak tama hamutuk 18.938,”afirma Virgilio.

Nia haktuir, agora dadauk Komisaun Homenazen abansa tan ba berifikasaun ho 20 mill rejistus, ne’ebé Governu atu komesa halo pagamentu ba sira.

“Agora dadauk ami taka edital, hodi taka avizu ba sira pontesiarus benefisiarus ba pensaun 2015 nian. Ami taka avizu ida ne’e, para depois kuandu iha reklamasaun ruma sir abele hato’o dentru loron 15, hodi ami hare fila-fali,”afirma Virgilio.

Nia dehan, total rejistu husi tinan 2009 ne’ebé mak seidauk hetan balidasaun ne’e, sei tomak hela (124 mill rejistus).

“Ami seidauk hahu rejistus 2009 nian, tanba tenke ensera tiha lai rejistus 2003 nian,”tenik Virgilio.

Nia esplika, edital ba 2015 nian, Ministra Solidaridade asina tiha ona iha tinan 2014, entaun hein deit prosesu pagamentu ona.

Iha fatin hanesan, Primeiru Ministru Rui Araújo mós hatete katak, Komisaun Homenajen tenke lori duni ema sira ne’ebé falsifika dokumentus hodi hetan osan husi Estadu ne’e, tanba hahalok ida ne’e ladiak.

“Tenke lori ba Tribunal, tanba ida ne’e burla ba sasan Estadu nian ona. konserteja sei iha oportunista atu halo buat sira hanesan ne’e,”lamenta Rui Araujo.

Xefe Governu ne’e dehan, atu situasaun ida ema lori komisaun nia naran bosok veteranus sira ne’e, Governu tenke halo kampa ida hodi eduka populasaun atu labele monu ba manobra sira ne’e.

“Tanba ita tenke rekoñese katak, buat ida kuandu implika ona benefisius ne’e, ita hotu hakarak koko sorte,”katak Rui Araújo.

Iha sorin seluk, eis Prezidente Komisaun Homenajen, Costodiu da Costa ‘Alin Laek’ mós informa katak, durante ne’e sira hala’o servisu tuir lei ne’ebé vigora tiha ona.

“Maibé ita nia veteranus sira ne’e, kontinua fó sala ba ami, tanba ne’e ami husu ba Governu tenke tau matan hodi rezolve veteranus nian,”katak Alin Laek.cos

Jornal Nacional