ASSANAMI SADIK HALOOT ORGANIZASAUN REJISTENSIA

DILI - Lideransa polítika jerasaun foun, Mariano “Asanami“ Sabino, husu ba líder rejistésia hotu atu haloot ona organizasaun rejisténsia iha muzeum, tanba Timor presiza faze foun. 

Nune’e mos Assanami sujere, lider antigu sira hanesan Xanana, Alkatiri, Lu-olo, no líder antigun seluk merese de’it sai aman ba nasaun, ne’ebé iha responsabilidade hamutuk hadi’a  nasaun ba oin, sira ne’e  hatur hanesan mestre no aman ba nasaun.

Assanami afirma kestaun hirak ne’e relasiona ho dezlutu nasional ne’ebé governu organiza hahú iha loron 4 Setembru 2015, ne’ebé tuir Assanami, la’ós  hakiik de’it  ba haloot  mehik ho kroat, maibé  nia dimensaun ne’ebé  luan.

Asanami hatete, haloot  mehik ho kroat ne’e buat kiik ida, i antes ne’e ita nia lian nain sira halo tiha ona, maibé  objetivu hosi  dezlutu  Nasional maka oinsa halo organizasaun reziténsia  sira, lider istóriku  sira haloot  ba iha nia fatin, iha muzeum. Tanba Timor presiza faze foun.

“Ita presiza ita nia lider tuan hosi   Partidu  UDT, FRETILIN prontu  husu deskulpa ba povu, konsekuénsia  barak, halulik  (bubarkan) organizasaun resisténsia  hanesan, OJETIl, RENETIL, IMPETTU, DSMPPT, Sagrada família  no seluk tan iha muzeum,” subliña Sekretáriu  Jeral Partidu Demokratriku ne’e via telefone baTimor Post,Segunda (31/08).

Líder jerasaun foun ne’e hatutan, dimensaun ne’e sei hamosu konsekeunsia sira, katak lider sira prontu  ka la’e, onestu ka la’e, so ida ne’e maka bele hamosu fali konstrusaun ba nasaun foun.

Haktuir tan prosesu dezlutu  ne’e iha buat barak ita sei halo, nia iha dimensaun barak, hare ba fator politika, iha mós fator sosial no kultural I mos ekonomia. Sosial maka ita hadomi fali ita nia kultura uluk feto-san, umane, ikus partidu  politiku mosu ema barak oho malu, fahe malu,entaun ita halo hamutuk fali,  parte kultural maka haloot  tiha kakaluk sira ne’e tau iha fatin. Lafahek ne’e simbolu rai Timor, ne’e mós ajuda ho forsa natureza ba luta hodi Timor ukun-an, buat sira ne’e sai pasadu no istoria, agora ita persiza honestidade hosi  lideransa sira hodi responsabilidade ba akompana prosesu nasaun ne’e la’o ba oin, e mos evita ema atu  ema balun labele estraga  tan figura istóriku  no partidu istóriku  sira ne’e.

Seitor ekonomia, ita hare ba iha stabilidade nasaun, iha ONG, Media, sira ho sira nia talentu partispativu ba konstrusaun nasaun, ita orgullo ho ida ne’e, ita persiza Timor Oan hotu-hotu kontribuiu ba dimensaun ekonomia hodi hari Timor foun ba Timor laran tomak, katak lider tenki transforma sai demokrasia.

Tanba ne’e, Assanami hatutan tan, dezlutu  labele hakiik de’it  ba haloot  mehik ho kroat.

“Ezemplu ha’u uluk involve iha RENETIL, ha’u labele uza RENETIL ba interese Partidu  Demokratiku, ne’ebé dezlutu  Nasional ne’e nia dimensaun ne’e luan, karik uluk iha ai-laran ita iha komando úniku ne’e, lider ida de’it, maibé  ukun-an ita tama ona iha era demokratizasaun katak Governu ho opozisaun ne’e hanesan kaduak ne’ebé nia povu hahoris sira nian rua, hodi kontrola malu,” subliña Assanami.(tos)

Timor Post