FILOMENO PAIXÃO: LAKOHI AKONTESE TAN HANESAN KRISE 2006

Dili, Radio Liberdade Online-Relasiona ho kazu dezentementu entre Unidade Polisia Fronteira (UPF), ho Polisia MIlitar iha froteira Maliana, Brigadeiro Jeneral, Filomeno Paixão, hateten hafoin invetigasaun seria tenki hola medidas konkretas atu nune’e labele akontese tan hanesan krize 2006.

“Labele hakiak fali lafaek no samea hodi tata fali ita, ne’e duni hau husu ba instituisaun rua ne’e(F-FDTL no PNTL), hafoin invertigasaun seria, tenki  hola medidas konkretas ba provokador sira, lakohi buat ne’e mosu tan hanesan krize 2006 ” tenik Brigadeiru, ba jornalista sira iha Palasiu Prezidenti Aitarak-Laran, Kuarta feira 23/09/2015, hafoin enkontru semanal ho Pretezidenti Republika Taur Matan Ruak.

Tuir informasaun ne’ebe Radio Liberdade aseusu katak Polisia Militar baku  membru UPF ho razaun la uza kapasete, kazu ne’e akontese iha loron 22/09/2015. 

Entertantu Brigadeiru Jeneral, Filomeno Paixão, klarifika liu tan kazu ne’e akontese duni no oras ne’e dadaun iha prosesu investigasaun nia laran.

Iha fatin hanesan  Komisariu PNTL,  Júlio Hornai, akresenta katak kazu entre Polisia Minilitar no UPF  rezolvidu ona no situasaun iha fronteira oras ne’e dadaun lao normal.

“Kazu iha fronteira  entre Polisia Militar  no Unidade Polisia Fronteira iha kalan ne’e resolve kedas no oras ne’e dadaun situasaun lao normal hela hanesan bain-bain", tenik Komisariu.(Dhesy)

Radio Liberdade Dili