Setor privadu nasional sente sai penonton deit

DÍLI - Setor privadu nasional husu ba Governu Timor-Leste tenke fo mos oportunidade ba emprezariu nasional involve iha implementasaun projetu governu atu bele eduka sira sai empreza ne’ebé boot iha future. Tuir prezidente Camara Comersio Industria Lautem, Costodio Jose Lopes katak durante ne’e kompañia estranjeiru ne’ebé mak hetan fiar husi governu hodi realiza projetu nunka halo joint venture ho kompañia nasional ne’ebé iha ne’e sai nudar lisaun ida ladiak ba iha futuru.

“Durante ne’e implementasaun projetu boot iha, nunka halo joint veture ho kompaña rai laran tanba sira haree ita nia rekursu minimum liu, ita ne’e hanesan esperensia deit tanba iha vontade mak ita halo buat sira ne’e maske ita laiha finanseiru atu kompete ho kompañia internasional,”dehan Prezidente CCI-Lautem Costodio Jose Lopes ba BT iha nia knar fatin Timor Plaza Kinta (17/09) foin lalais ne’e.

Nia dehan durante ne’e kompañia barak mak hadau mesak paun  rohan ne’ebé mak iha nunka fahe ba iha emprezariu sira iha rai laran hodi bele hetan mos benifisiu no setor privadu nasional kontinua sai penonton iha nia rain rasik. “Se karik bolu emprezariu estranjeiru mai tenke joint venture ho emprezariu rai laran laos sira mai hamrik mesak- mesak, mai hadau malu fali paun rohan  no restu sira lori hotu no emprezariu rai nain sai penonton,”nia lamenta.

Constodio amiasa katak bainhira projetu ruma implementa iha Lospalos la iha joint ho empreza nasional  mak emprezariu Lautem sei halo asaun hasoru governu no kompañia internasional. “Hau hakarak hatete deit katak emprezariu Lautem pronto atu kaer obra estadu nian, hau mos rona katak governu atu ba impresta osan husi Xina no Japaun $5 Milloens no Lospalos pronto halao dezenvolvimentu iha ita nia rai, emprezariu Lospalos la tolera ema tama iha ne’eba kaer projetu mesak-mesak no ba tenke servisu hamutuk ho emprezariu rai nain lautem,” dehan nia.

Nia ezije ba governu atu fo mos oportunidade ba emprezariu timoroan noa labele hanehan demais emprezariu sira. Timoroan sira atu bele kaer obra estadu nian ,Ita hotu hotu hatene katak nasaun ne’e tenke ba oin tenke fo oportunidade ba iha Emprezariu TImoroan sira,” dehan nia. Iha fatin seluk Prezidente Camara Comersio Industria Suai kestiona mos katak durante ne’e Implementasaun projetu boot iha Munisipiu Covalima hanesan Aeroportu nomos projetu estrada governu ho kompañia ne’ebé mak implementa projetu la fo koñesementu ba iha Emprezariu sira.

“Durante ne’e implementasaun projetu estrada hahu husi fronteira to’o iha Zumalai no Aeroportu kompañia sira nunka fo koñesementu ba ami maske projetu ne’e implementa iha ami nia munisipiu”, dehan Julio. Tuir nia katak iha lei aprovisionamentu hateten katak implementasaun projetu 25% Local Contain tenke hela maibe realidade la hatudu. Nia husu ba governu kuandu implementa projetu ruma iha Munisipiu tenke implika 25% ba iha emprezariu sira iha munisipiu.

“Hau nia rekomendasaun ba iha Governu mak ne’e kuandu implementa projetu ruma iha Munisipiu sira local Contein 25% , Implementador projetu tenke implika no tenke halo kordenasaun  direita ho CCI-Munisipiu sira tanba bazea ba iha lei aprovisionamentu mak hateten tanba hakarak ka lakohi tenke 25% local kontein tenke husik hela iha munisipiu ne’ebe implementa projetu,” dehan Julio do Carmo. Nia mos husu ba iha kompañia internasional ne’ebe mak hetan projetu tenke kumpri lei aprovisionamentu ne’ebé mak iha hodi nune’e sirkulasaun osan kontinua lao iha rai laran tanba bainhira la akontese mak moeda sei la sirkula iha rai laran no suli hotu  ba rai liur. (BT)

Business Timor