Julgamentu Ba Loron Rua, Parte Dader Rona Deit Pedidu Defesa Emília

DILI - Kontinuasaun audensia julgamentu ba loron rua iha parte dader tribunal la konsege rona deklarasaun husi sasin nain hitu neebe mak marka ona, tanba deit rekerementu no rekursu neebe mai husi parte defesa arguida Emilia Pires nian.

Liu husi audensia julgamentu ba loron rua iha parte dader nian, neebe tuir orario tribunal sei rona deklarasaun husi sasin akuzasaun nain hitu neebe mak notifika ona. Maibe agenda nee la konsege realiza iha tuku 9:00 too tuku 12:00 meudia tanba autor judisiario sira iha sala audensia nee presija halo diskusaun kona ba  ka rekerimentu neebe mak hatoo husi advogadu Portugal arguida Emilia Pires nian.

Rekerementu neebe mak defesa Emilia nian husu atu nomeia rasik sira nia tradutor iha sala audensia para bele fasilita sira iha lingua nian. Pedidu nee sira baseia ba artigu 83 kodigu penal para bele fasilita sira. Tanba sira la komprende ho liafuan neebe mak koalia husi tradutor tribunal nian.

Hatan ba pedidu nee parte Ministeriu Publiku la konkorda ho pedidu nee, tanba kuandu liga  artigu 83 ho artigu 13 kodigu penal autor judisiario hanesan juis, advogadu no prokurador tenke domina lian offisial RDTL nian mak tetum ho portugues. Tanba lian rua nee mak uza iha tribunal. No ida nee ministeriu publiku mantein pozisaun hodi husu ba tribunal atu kontinua ho julgamentu.

Depois parte defesa halo rekerementu no MP halo depoimentu hodi la konkorda pedidu nee. Tribunal suspende minutu 10 hodi reuni juis kolektivu nian, hafoin halo despaisu ba pedidu nee. Iha despaisu nee, tribunal mos la konkorda ho pedidu neebe iha. Tanba iha artigu 13 kodigu penal nian hatete katak lingua tetum ho portugues mak iha tribunal, laiha tan lian seluk. No iha artigu 83 hatete tribunal sei bele nomeia fali tradutor seluk kuandu arguida, vitima no testamunha neebe la hatete lian rua nee. Neebe nomeasaun tradutor nee laos interese autor judisiario sira nian. Interprete nain tolu neebe mak tribunal nomeia nee kualifikadu no halo ona juramentu ba sira nia fungsaun antes mai iha tribunal.

Rona ida nee parte defesa senti la satisfeitu husu ba tribunal atu halo rekursu ba sira nia rekerementu nee. Tanba nudar defesa iha direitu atu defende sira nia kliente. Hatan ba rekursu nee tribunal aseita rekursu defesa nian, tanba defesa mos iha direitu atu defende nia kliente kuandu bainhira la satisfas ho desizaun neebe mak iha. Informasaun kompletu iha STL Jornal no STL Web, edisaun Kuarta, (7/10/2015). Domingas Gomes/ Joao Anibal

Suara Timor Lorosae