Rekursu Joao Cançio Sei iha TDD, Arlindo: Tribunal Laiha Provas Atu Kondena

DILI - Defesa husi arguidu Joao Cançio nian halo ona rekursu iha Tribunal Distrital Dili, tanba la konkorda ho desizaun neebe mak iha, no laiha provas ida atu kondena ba sira nia kliente.

Tuir advogadu privadu Arlindo Marçal neebe fo mos nia assistensia ba arguidu Joao Cançio hatete, sira nia parte halo ona rekursu ba iha TDD hodi haruka ba iha Tribunal Rekursu. Halo rekursu nee tanba la konkorda ho desizaun neebe mak tribunal aplika ba sira nia kliente.

Tribunal laiha provas ida atu kondena ba arguidu nee, tanba sei iha mos arguidu seluk neebe mak MP la akuza iha kazu nee. Tanba neemak ami la konkorda ho kondenasaun nee, tanba sasin nain hira neebe mak fo sira nia deklarasaun iha tribunal nee, sira mos halo pagamentu hotu ba kompania nee no vice ministru Paul Assis mak asina laos ami nia kliente mak asina. Neemak ami mantein la konkorda ho desizaun nee hodi halo rekursu. Neebe hein deit desizaun husi TR depois TDD haruka ba,”dehan nia ba jornalista iha TDD, Tersa (06/10/2015).

Nunee mos advogadu Jose Guteres hatete, rekursu nee sira halo ona sei iha hela iha TDD. Depois Ministeriu Publiku hatama ninian mak foin haruka dala ida ba iha Tribunal Rekursu. Iha rekursu nee sira la konkorda la konkorda ho desizaun nee. Tanba arguidu ba kazu nee laos Joao Cançio mesak maibe involve mos sasin sira neebe mai fo deklarasaun iha tribunal.

Antes nee iha loron 20 fulan Jullu 2015 liu ba Tribunal Distrital Dili (TDD) aplika pena prizaun tinan 7 ba arguidu Joao Cançio no selu indimizasaun ba estadu ho valor rihun $500. Enkuantu arguidu Tarsisio do Carmo tama kadeia tinan 3 fulan 6 no selu indimizasaun ho valor rihun $200. Tanba arguidu provadu halakon osan estadu ho valor milaun $1,410.000,00. Informasaun kompletu iha STL Jornal no STL Web, edisaun Kuarta, (7/10/2015). Domingas Gomes/Joao Anibal

Suara Timor Lorosae