JULGAMENTU LORON DAHULUK IHA TDD – EMILIA HO MADALENA LA KOALIA

Eis Ministra Finansas iha IV ho V Governu, Emilia Pires no Vise Ministra Saude iha IV Governu konstitusional, Madalena Hanjam, Segunda (05/10), tenki ba tur iha kadeira Tribunal Distrital Dili (TDD) hodi hatan ba julgamentu loron dahuluk tanba deskonfia halakon osan Estadu ho valor U$ 811,040,00. Iha julgamentu refere arguida nain rua ne’e hili dalan nonok.

Antes juiz sira atu hahú julgamentu, durante oras ida nia laran sei rona rekursu husi parte defesa ne’ebe antes ne’e hato’o ona ba tribunal, husu halo alterasaun lei balun, arola mos sasin ne’ebe parte Ministeriu Publiku arola no bele halo sesaun perguntas no respostas ba uluk sasin sira depois leitura akordaun. Hatan ba rekerementu ne’e parte Ministeriu Publiku la konkorda ho pedidu parte defesa sira nian nune’e mos tribunal la aseita hodi kontinua audensia ne’ebe mak marka ona.

Tuir akuzasaun Ministeriu Publiku (MP), ne’ebe tribunal le’e sai katak arguida nain rua iha loron 9 Fevereiru 2011 arguida Madalena Hanjam sei nudar Vise Ministra Saudé iha VI Governu, haruka karta VMS/PM/11/50 ba Primeiru Ministru husu fundu adisional ida Ministeriu Saudé ba alojamentu no alimentasaun médiku Cubano sira inklui unidade kardiolojia, ho orsamentu fundus kontijente iha tinan 2011-2012 nian.

Prosesu ne’e sei la’o hela, arguida Madalena Hanjam futu lia ona ho arguida Emilia Pires hodi iha deit hanoin ida, garantia benefisia ekonomiku ida, ikus arguida Emilia Pires nia laen Warren Gene Macleod ba almosu bebeik iha arguida Madalena Hanjam nia uma, iha almosu ne’e sira diskuti sobre prosesu ekipamentus sosa ba Hospital Nasional Guidu Valedares.

Iha tempu hanesan arguida Emilia Pires sei nudar Ministra Finasas ba almosu iha Restaurante Nelayan besik iha estrada area Branca Díli ho arguida Madalena Hanjam hodi koalia sobre adjudikasaun projetu fornese kama no sosan ekipamantus mediku Cubano, ikus mai arguido nain rua futu lia, arguida Madalena Hanjam influensia aprovizionamentu MS hodi fó projetu ne’e ba kompañia Macs Metal craft nia director naran Warren Gene Macleod ne’ebé nudar laen hosi arguida Emilia Pires nian.

Arguida Emilia Pires hola parte iha proseu finansiamentu husi kontratu projetu sosa kama no ekipamentus mediku Cubano ne’ebé nia laen reprezenta impedimentu ida konflitus de interese.Mas ikus mai kama no ekipamentus ba Cubano sira kompradu duni husi laen arguida Emilia Pires, maibe ekipamentus sira labele utiliza tanbá kondisaun la diak.

Ho hahalok ne’e, arguida Emilia Maria Valério Pires ho Madalena Fernandes Melo Hanjam komete krimi iha koa auditoria material no Konkursu Real, hanesan krimi partisipasaun ekonomika iha Negósiu, husi artigu 299 numeru 1-2. Kodigu Penal, Krimi administrasun danoza husi artigu 274 numeru 2 kodigu penal, halakon osan Estadu tanbá kama no ekipamentus sira la utiliza to’o agora.

Kauza hosi arguidu nain rua nia hahalok, lori prezuizu direta no nesesariu hodi halakon osan Estadu hamutuk U$ 811.040,00. Tan ne’e Estadu iha direitu atu simu osan ruma ho prejuizu ne’ebé mosu ona.

Hafoin rona tiha akuzasaun sira ne’e hotu ne’ebe lee sai husi tribunal arguida nain rua Emilia Pires ho Madalena Hanjam hili dalan nonok. Tanba ne’e Tribunal adia audensia hodi kontinua iha aban (ohin) tuku 9:00 dader.

Audensia julgamen Prezidi husi Juiz koletivu, juiz Prezidente, José Maria de Araújo, Francisca Cabral, Maria Solana, Ministeriu Publiku Reprezenta husi Prokurador Jacinto Babo, Prokuradora Angelina Saldanha ho Lidia Soares no arguida Emilia Pires hetan asistensia legal husi advogadu privadu José Pedro Camões no advogadu Portugal nain rua; arguida Madalena Hanjam hetan asistensia husi advogadu privadu José Guterres ho Advogadu Portugal nain ida.Des

Jornal Nacional