Peregrinasaun ba Nain Feto Aitara, D. Basilio: “Peregrinasaun ba Fatin Santu, Hakbesik An ba Maromak”

DILI - Sarani sira kompostu husi Dioseze Maliana, Dili no Baucau halao peregirnasaun ba Santuariu Nasional Nossa Senhora de Aitara, hodi hatudu devosaun ba nain Feto liu husi peregrinasaun nee.

Aktividade nebe halao durante loron tolu mak hanesan iha loron Sesta (16/10/2015), peregrinu sira too iha fatin Santuariu. Iha loron tuir mai Sabado (17/10/2015) loraik, misa ba ema moras no ferik katuas sira, nebe preside husi Reprejentante Vaticano iha Timor Leste, Mgr. Younut Paul, akompanha husi Bispo dioseze Baucau Dom Basilio do Nascimento hamutuk ho padre sira. Iha misa nee mos hetan partisipasaun husi madre nomos sarani sira.

Hafoin misa, iha kalan kontinua ho adorasaun Santissimu, nebe kada dioseze halao iha fatin diferente, hanesan dioseze Maliana halao iha fatin Joao Paulo II (Igreja Soebada nia Sorin), Dioseze Dili iha kolejiu femenina Soebada, no Dioseze Baucau halao adorasaun iha Santuario Nasional Nossa Senhora de Aitara.

Iha loron tuir mai, Domingo (18/10/2015), kontinua ho prosissaun Nain Feto, nebe halao husi Igreja Soebada ba foho Santu, Santuariu Nasional Nossa Senhora de Aitara, no kontinua ho misa nebe preside husi Bispo dioseze Baucau Dom Basilio do Nascimento, akompanha husi Reprejentante Vaticanu iha Timor Leste, Mgr. Younut Paul hamutuk ho padre no madre sira, nebe hetan partisipasaun mos husi sarani dioseze tolu nee.

Iha misa enserramentu peregrinasaun Nain Feto Aitara, D. Basilio hateten kada tinan sarani sira halibur hamutuk iha Santuariu nee hodi hatudu devosaun ba nain feto.

Ohin ita mai iha nee hodi fo ksolok ba Maromak, bai-bain ita husu Maromak atu fo ksolok mai ita, maibe ohin profeta ida nee koalia, dada ita nia fuan hodi hare oinsa ita ema fo ksolok ba maromak,” dehan D. Basilio liu husi misa enserramentu Peregrinasaun Nain Feto Aitara, iha santuariu Nain Feto Aitara, Soebada, Domingo (18/10/2015).

D. Basilio hateten Tinan-tinan sarani katolika iha timor halibur hamutuk iha santuariu nee hodi haleu no hanai nain Feto atu husu no hasae an tomak ba Maromak, hodi nunee bele haraik nafatin grasa, bensa no perdaun ba nia oan sira nebe sala nain.

Iha oportunidade nee mos reprejentante Vaticanu iha Timor Leste, Mgr. Younut Paul hateten sarani hotu nebe prezensa iha fatin nee bele hametin liu tan fiar no komprimissiu nudar ema kristaun dia kida. Informasaun kompletu iha STL jornal no STL Web, edisaun Tersa, (20/10/2015). Josefa Parada-Orlando Pereira

Suara Timor Lorosae