Ministru
Negósiu Estranjeiru timoroan nian hatete ohin ba Lusa katak hakarak fasilita
prosesu vistu sira entrada nian iha Indonézia ba kovidadu sira nebe hakarak
partisipa iha selebrasaun tinan 40 independénsia Timor-Leste nian.
"Ami
ko'alia hela ho Indonézia hodi fasilita kestaun sira konvidadu nian. Sira
entrega mai ami pasaporte no ami trata vistu sira, tanba ne'e sei laiha
problema", Hernâni Coelho hatete ba Lusa.
Difikuldade
tékniku sira, hosi Indonézia, komplika viajen hosi rai entre Timor-Leste no
enklave Oecusse-Ambeno, nebe iha fulan-Novembru sei simu selebrasaun sira tinan
40 deklarasaun unilaterál ba independénsia Timor-Leste nian no tinan 500 ba
navegadór portugés dahuluk sira nebe to'o iha illa.
Maibé,
Hernâni Coelho hatete ba Lusa katak "vistu sira tenki husu iha embaixada
indonéziu nian iha Díli, tanba laiha infraestrutura no kondisaun sira hodi fó
vistu bainhira to'o iha postu fronteira sira nian".
"Prosesamentu
hosi vistu hanesan baibain, aplika ba nasaun ida-idak ho nia regra rasik.
Nune'e iha fronteira ami iha situasaun ida nebe susar oituan duké iha pontu
sira seluk entrada nian iha Indonézia tanba laiha sistema dijitalizasaun hodi
hetan vistu bainhira to'o, hanesan akontese iha fatin sira seluk", nia
hatete.
"Ko'alia
hela kestaun ne'e no posibilidade hodi loke entre pontu lima to'o pontu sia
entrada nian nebe iha ekipamentu no nebe fasilita vistu ida hanesan ne'e",
hatete.
Nia
afirma katak prosesu ida nebe sei la hotu antes selebrasaun sira maibé sei la
sai hanesan problema ida ba konvidadu sira - "nasaun haat to'o nasaun lima
konfirma ona katak sei reprezentadu iha nível xefe Estadu no Governu
nian".
"Ami
la haree problema boot ida iha kestaun ne'e", nia hatete no esplika katak
Timor-Leste ko'alia hela kona-bá abertura ba asesu espesiál ba konvidadu sira
hosi eventu nebe previstu ba loron sira 26 to'o 28 fulan-Novembru.
Delegasaun
ida hosi Timor-Leste, nebe lidera hosi sekretáriu-jerál hosi Ministériu Negósiu
Estranjeiru, Francisco Cepeda, no integra reprezentante sira hosi gabinete
oioin, iha hela Surabaya hodi koa'lia ho autoridade indonéziu sira kona-bá
fronteira marítimu.
MNE
informa ona iha komunikadu katak reuniaun, nebe akontese iha loron-kinta no
loron-sesta, halo hafoin reuniaun sira nebe akontese iha Díli iha
fulan-Setembru no sei analiza termu sira referénsia nian no planu serbisu hosi
prosesu negosiasaun entre nasaun rua ne'e kona-bá asuntu ne'e.
SAPO
TL ho Lusa
Sem comentários:
Enviar um comentário