LERE SENTE MORAS, FILOMENO HASORU TAUR

Xefi Estadu Maior das Falintil Forsa Defeza Timor Leste (F-FDTL), Maijor Jeneral Lere Anan Timur delega Brigadeiru Jeneral Filomeno Paixão hodi halo enkontru ho Prezidenti Repúblika (PR) Taur Matan Ruak, tanba Lere Anan Timur mal dispostu oituan (moras).

Brigadeiru Jeneral Filomeno Paixão informa katak, enkontru ne’ebé nia halo ho Prezidenti Repúblika Taur Matan Ruak ne’e, atu informa kona-ba servisu ne’ebé la’o iha militar nia laran durante ne’e.

“Enkontru normal ho Prezidenti Repúblika atu ko’alia kona-ba dezenvolvimentu Forsa Defeza Timor Leste nian, tanba ohin Jeneral Lere mal dispostu oituan, desde horseik nia moras, i nia husu ba ha’u mai hasoru Prezidenti,” informa Filomeno Paixão ba Jornalista sira iha Palácio Prezidensiál Aitarak Laran Dili, Kuarta (09/03), hafoin hasoru malu ho PR Taur Matan Ruak.

Filomeno Paixão dehan, iha sorumutu ne’e, sira la ko’alia kona-ba ezonerasaun ka substituisaun Lere nian.

“Informa de’it kona-ba dezenvolvimentus komponentes nian hanesan normalmente ha’u halo,” katak Filomeno Paixão.

Kona-ba pro-kontra ne’ebé agora dada’uk mosu iha Estadu kona-ba ezonerasaun Jeneral Lere nian, Filomeno Paixão dehan, sei la fó impaktu ba lala’ok dezenvolvimentu iha instituisaun F-FDTL.

Kona-ba prosesu ezonerasaun ba Jeneral Lere Anan Timor nian, oras ne’e la’o oinsa ona, Filomeno Paixão dehan nia laiha komentariu ba ida ne’e.

“Ami forsa ami hein orden de’it, komesa Jeneral to’o soldadus, ha’u ko’alia bei-beik ba ha’u nia ofisiais no soldadu sira, ita ne’e militar, ita hein orden de’it orden husi leten,” informa Filomeno Paixão.cos

Jornal Nacional