Veteranu timoroan hametin relasaun ho Komunidade Veteranu Australianu sira nian

Veteranu na'in 29 hosi Luta ba Libertasaun Nasional Timor-Leste nian sei vizita Austrália iha semana oinmai, hodi hasoru malu ho membru sira hosi Komunidade Veteranu Australianu sira nian no sei partisipa iha eventu sira hosi komemorasaun ba Loron Veteranu sira nian, ANZAC Day iha loron 25 Abril.

Delegasaun sira sei hela iha Perth, Sidney, Brisbane ho Canberra, sei iha delegasaun ki'ik ida ne'ebé sei halo viajen entre sidade prinsipal sira. Ministru Planeamentu no Investimentu Estratéjiku no Negosiadór Prinsipál ba Fronteira Tasi nian, Kay Rala Xanana Gusmão, lidera vizita no akompaña hosi Visi-Ministru Solidariedade Sosial, Miguel Marques Manetelu. Sei partisipa mós Francisco Guterres ne'ebé hanesan Prezidente FRETILIN no eis-Prezidente Parlamentu Nasional no Koronel Falur Rate Laek ne'ebé reprezenta F-FDTL. Inês de Almeida, Ofisial hosi Ligasaun ba Asuntu sira Veteranu nian hosi Gabinete Primeiru-Ministru Timor-Leste nian maka hanesan kordenadora hosi vizita no porta-vós hosi delegasaun.

Viajen ne'e sei tulun hodi hametin lasu sira amizade nian entre veteranu sira Timor-Leste ho Komunidade hosi Veteranu Australianu nian. Relasaun sira ho Returned and Services League [RSL – liga hosi militar australianu veteranu sira no iha ativu] no Organizasaun hosi Feto-faluk hosi Funu Austrália nian hahú hosi tinan 2014 no hamosu ona vizita serbisu oioin hosi veteranu australianu sira nian iha Díli. Maibé, Timor-Leste dezenvolve ona nia Konsellu Nasional hosi Kombatente sira ba Libertasaun Nasional rasin no veteranu sira halo nafatin reuniaun sira hodi haree oinsá dalan di'ak hodi konserva nia istória ba jerasaun foun sira, hodi honra ema sira ne'ebé mate no mós ba sobrevivente sira.

Iha fatin ida-idak, veteranu sira hosi Timor-Leste sei vizita instalasaun sira apoiu nian ba antigu militar sira ne'ebé harii ona iha Austrália, sei partisipa iha komemorasaun sira hosi Loron ANZAC no hasoru malu ho membru sira hosi Komunidade Timoroan sira. Tinan ne'e, grupu ida ne'ebé lidera hosi Koronel Falur Rate Laek sei dezenvolve dalan ida iha parke nasional rua, iha foho sira iha Timor-Leste. Grupu ne'e sei avalia nia potensial turístiku no oportunidade sira ba veteranu sira hodi fahe istória Rezisténsia nian.

Ba Prezidente hosi RSL hosi Estadu New South Wales, Rod White, sai hanesan priviléjiu ba nia organizasaun hodi serbisu hamutuk ho veteranu sira hosi Timor-Leste no nia subliña ona katak reforsu hosi lasu amizade nian sei hamosu "relasaun kleur ida" entre komunidade veteranu rua ne'e.

Kona-bá viajen, veteranu timoroan Jorge Alves hatete ona katak sira "hetan konviti hodi marka prezensa iha Loron Veteranu sira hosi Austrália no solidariedade entre grupu sira hosi nasaun rua ne'e halo ita nia istória sai forte no sei la haluha".

Porta-vós hosi Governu Konstitusional ba dala VI, Ministru Estadu Agio Pereira, afirma katak "ligasaun entre veteranu australianu no timoroan sira karakterizadu ho amizade metin ida, respeitu maka'as no vontade di'ak ne'ebé loloos. Governu felisita relasaun ne'ebé hanoin atu bele dura kleur no felisita delegasaun ne'ebé reprezenta ita nia nasaun, ne'ebé honra no haree ba nia veteranu sira no partisipa iha komemorasaun sira hosi Loron ANZAC nian".

SAPO TL - Fonte: Portal Governo Timor-Leste nian