Banku Aziátiku Dezenvolvimentu destina ona dolár millaun 325 ba Timor-Leste to'o 2020

Banku Aziátiku Dezenvolvimentu (BAD) fó sai iha loron-segunda ne'e Estratéjia Parseria Nasaun nian (EPS) ho Timor-Leste ba 2016-2020, hodi hametin infraestrutura sira, kapital humanu no instituisaun sira nian, ho pakote dahuluk investimentu nian hamutuk dolár millaun 325.

Iha komunikadu, BAD esplika ona katak EPS foun destina ba Timor-Leste hodi dezenvolve alternativu ekonómiku sira iha setór petróleu no gás natural no pakote ba tinan haat oinmai inklui empréstimu sira no asisténsia tékniku.

BAD esplika katak sei tenta depozita mós apoiu finanseiru no empréstimu sira hosi fonte finansiamentu sira seluk.

"Ne'e hanesan momentu krítiku ida ba dezenvolvimentu Timor-Leste nian, ho estabilidade no retornu iha estrasaun hosi rekursu sira hodi harii plataforma ida ba dezenvolvimentu klean iha nasaun", hatete hosi Shane Rosenthal, diretór BAD nian iha Timor-Leste.

"BAD hein ho espetitativu hodi aumenta parseria ho Timor-Leste no ami sei kontinua kordena ami nia operasaun sira iha rai laran ho operasaun sira hosi ami nia parseiru sira dezenvolvimentu nian", nia hatutan.

Kuadru foun apoiu ba Timor-Leste sei kanaliza, tuir BAD, ba projetu sira hanesan aumentu ba asesu bee-moos iha sentru urbanu boot sira no hadi'a sustentabilidade finanseiru no ambiental hosi sistema elétriku.

Sei inklui mós apoiu ba dezenvolvimentu hosi sistema integradu ida ba ensinu tékniku no kontinua reforma importante sira ba dezenvolvimentu hosi setór finanseiru.

Timor-Leste adere ona ba BAD iha 2002 no simu ona empréstimu totál hamutuk dolár millaun 178, doasaun millaun 137,8 no finansiamentu hosi asisténsia tékniku liu dolár millaun 35,8.

Fó hanoin fali katak Governu timoroan hala'o daudaun prosesu ida reforma hosi ekonomia, hodi hamenus dependénsia iha petróleu no gás natural.

BAD hatudu katak kresimentu hosi PIB la'ós petrolíferu karik sei haleu entre 4,1% iha 2015, aumentu oituan tinan ne'e ba 4,5%, folin ne'e bele aumenta ba 5,5% iha tinan oinmai, impulsiona hosi investimentu públiku no privadu.

SAPO TL ho Lusa