ESCOLA SÃO JOSÉ OPERÁRIO-BALIDE “20 DE MAIO MARKA ISTÓRIA BA ESTUDANTE”

Dili - Superintendente da Inspecção da Educação do Municipio de Dili, Virgilio Freitas Cabral hatete, komemorasaun loron Restaurasaun Independensia 20 de Maiu hanesan loron ida ne’ebé  marka istória ba estudante no jerasaun foun sira atu bele komprende no hatene.

“Loron 20 de Maiu loron refleksaun Restaurasaun Independensia, ne’ebé maka restaura iha loron 20 de Maiu tinan 2002, tanba ne’e mak Timor laran  tomak selebra loron Independensia ida ne’e, I loron ida ne’e mos marka istória ida ba estudante sira nomós ba jerasaun foun sira atu banati tuir, “dehan, Virgilio Freitas Cabral, ba Jornalista sira iha Ensino Secundário Geral-ESG São José Operário Balide Dili, Sesta 20/5/2016).

Superintendente da Inspecção da Educação do Municipio de Dili ne’e mos, sente orgullu bainhira hare’e estudante hosi Escola São José Operário realiza Içar Bandeira hodi komemora loron restaurasaun  independensia ne’ebé  marka  istória ida ba escola, tanba ne’e escola kontinua nafatin halao içar bandeira fulan-fulan.

“Ita mos orgullu bainhira ita nia estudante ida sesionadu hodi içar bandeira iha loron importante sira hanesan ne’e naran  boot ba escola liliu Escola Secundária Geral 20 de Maiu, tanba ne’e hau husu ba Director da Escola ho Mestri/a sira kontinua no orienta nafatin estudante sira ba iha içar bandeira ne’e, “ nia subliña.

Iha fatin hanesan Director da Escola Secundária Geral São José Operário Balide, Anacleto da Costa hatete, sira hala’o içar bandeira ne’e la’os foin hahu, maibé tinan-tinan sira importante sira hanesan 20 de Maiu, 30 de Agostu no 28 Novembru no seluk tan.

Entertantu estudante nain sanulu (10) husi Escola São José Operário mak selesianadu hodi partisipa içar bandeira ba Restaurasaun Independensia 20 de Maiu iha Municipio Ermera, ida ne’e orgullu bo’ot ba escola.

“Ami nia estudante nain sanulu (10) selesionadu hodi partisipa içar bandeira restaurasaun independensia 20 de maiu iha Municipio Ermera, ida ne’e orgullu bo’ot ida ba ami nia escola, ne’e signifika katak Escola Católica mós lakohi lakon ho Escola Públiku sira,” nia apresia.

Entertantu liu husi komemorasaun loron restaurasaun 20 de Maiu tinan ne’e, escola refere mós hala’o átividade sira seluk hanesan átividade Sertame ka Kadi Kakutak, Diskursu, Kulináriu, Musika, Desporto, Dansa Tradisional no átividade seluk tan. (fer)

Timor-Post, Loron Sabadu, 21 Maiu 2016  - Foto: Corpo da Içar Bandeira Nacional Estudante São José Operário-Balide, Díli