Metode Investigasaun PNTL Latuir Prosedimentu

DILI – Metode investigasaun neebe maka Polisia Nasional Timor Leste (PNTL) iha Munisipiu Lautem, halao latuir prosedimentu neebe maka iha, tamba sira kaer ema nain 10 lori ba sela ho kondisaun la uja ropa.

Membru PN husi bankada FRETILIN Aurelio Freitas hatete, metode investigasaun polisia halo nee sala, latuir prosedimentu legal neebe iha, I larespeita ema nia dignidade hanesan humana, sira lori ema sai husi sela ho kondisaun la uja ropa, liu ba mai iha Polisia nia oin.

Hau rona informasaun iha Munisipiu Lautem maluk Polisia sira latuir lei, tamba sira kaer ita nia maluk sira kuaze nain 10 ba tau iha sela hanesan molik, kolu hotu nia ropa hatais deit maka ropa laran,” dehan deputadu Aurelio, iha sesaun plenaria, Segunda (23/05/2016).

Nia hatete, ema bele komprende iha sela laran ho rajaun seguransa, maibee kuandu lori ba investiga sira tenki kondisaun Ida livre, sira nia advogadu tenki akompania lori husi sela ba fatin investigasaun.

Iha fatin hanesan membru PN husi bankada PD, Jacinta Pereira hatete, atetude pesoal polisia neebe maka halo, ho sira nia hahalok neebe maka deshumanu maske sala tenki koloka iha fatin, labele halo malu hanesan nee.

Entertantu Sekertariu Estadu Parlamentar Terezinha Maria Viegas hatete, sira sei informa kedas ba iha Polisia atu bele bolu atensaun, depois fo resposta ba iha presaun neebe maka polisia Eskuadra Munisipiu Lautem halo ba komunidade sira. Informasaun kompletu iha STL Jornal no STL Web, edisaun Tersa (24/5/2016). Carme Ximenes

Suara Timor Lorosae