HARUKA EURICO NIA OAN BA TRATAMENTU IHA RAI LIUR, PM RUI: LORI MÉDIKU SIRA BA TRIBUNAL

Primeiru Ministru (PM), Rui Maria de Araújo haruka prosesa ba tribunal, mediku sira ne’ebé mak foti desizaun hodi haruka lider pro autonómista, Eurico Guterres nia oan mane, Ronaldo Guterres ba halo tratamentu iha Bali, kuandu la satisfas ho desizaun ida ne’e.

PM Rui Araújo dehan, responsavel sira iha Hospital Nasionál Guido Valadares (HNGV) esplika tiha ona ba públiku katak, buat hotu ne’ebé sira halo ne’e, bazeia ba lei.

“Sé buat ida ne’e kontra lei, ema ne’ebé senti prejudikadu, bele lori kazu ne’e ba tribunal,” dehan PM Rui Araújo ba jornalista sira iha Palácio Prezidénsia Aitarak Laran Dili, Kinta (28/07).

Xefi Governu ne’e haktuir, lei ne’e mós defini ona kritérius atu haruka ema ba halo tratamentu iha rai liur.

“Iha dekreitu lei númeru 9/2010, ne’ebé regula kestoens sira relasionadu ho haruka ema ba halo tratamentu iha rai liur, i grupu médikus iha hospital, tuir lei sira mak iha autoridade para desidi,” Xefi Governu ne’e haklaken.

Nia hatutan, buat ne’ebé mak médika sira halo ne’e, bazeia ba lei, sé ema balun konsidera katak, ida ne’e viola lei, sidadaun hotu iha obrigasaun atu aprezenta keixa.

Xefi Governu ne’e dehan, lei mak regula buat hotu, tanba ne’e, kuandu médiku sira ne’e kontra lei, tenki responsabiliza situasaun ida ne’e.cos

Jornal Nacional