TAUR MATAN RUAK: ESTADU LABELE HALO BUAT HOTU DALA IDA

Prezidenti Repúblika (PR) Taur Matan Ruak hateten katak, Estadu Timor Leste (TL) esforsu maka’as atu fó apoiu no ajuda feto faluk oan ki’ak no kbiit la’e sira, maibé Estadu labele halo buat hotu dala ida deit ba ema hotu-hotu, tanba feto faluk no kbiit la’ek sira barak.

“Ita laiha kbi’it atu halo ba ema hotu dala ida, entaun tenki balun hetan uluk no balun ikus,” hateten Taur Matan Ruak, bainhira diálogu ho komunidade sira iha Suku Ahik, Postu Administrativu Lakluta, Munisípiu Viqueque, Tersa (06/09).

Taur Matan Ruak esplika katak, Estadu halo dezenvolvimentu etapa por etapa.

Diálogu PR ho komunidade Suku Ahik ne’e populasaun sira antusiaismu hato’o sira nian problema ne’ebé mak sira infrenta lor-loron durante iha tempu okupasaun to’o ukun-an ne’e.

Hanesan José Soares komunidade Januário Soares, mós dehan katak, povu iha Suku Ahik ne’e, halerik liu ba bee moos, durante ukun-an to’o agora, maibé bee moos laiha.

Nune’e mós komunidade Isac Martinho levanta problema kona-ba veteranus iha ninia suku, tanba sira ne’ebé luta durante tinan 13, hetan 4 a 7 de’it.

Entretantu Armindo Gomes hateten alénde feto faluk ho kbiit laek sira ne’ebé seidauk hetan apoiu husi Estadu, nune’e mós komunidade iha Suku refere seidauk hetan ahi eletrisidade, durante okupasaun to’o ohin loron ukun rasik-an.

Tanba ne’e, nia  husu ba PR Taur atu tulun netik jerador ida hodi povu bele uza ba sira nia presiza.

“Imi hot-hotu husu jerador ne’e, ha’u atu ba lamas osan iha ne’ebé atu fó ba imi, imi hein oituan, tanba imi nia eletrisidade atu mai ona,” dehan Taur Matan Ruak hodi hatán ba komunidade sira nia pedidu.

Kona-ba bee moos ne’e,PR Taur Matan Ruak dehan,  bee moos ne’e la’os preokupasaun povu iha área rural de’it, maibé bee moos ne’e sai problema bo’ot, tanba povu iha kapital Díli de’it mós, tenki la’o dok hodi buka bee.

Kona-ba porblema veteranus, Taur Matan Ruak dehan, veteranus ne’e sai problema bo’ot tebes ba Estadu Timor Leste (TL) tanba osan.

Nia esklarese, osan halo veteranus sira fahe malu entre sira ne’ebé simu ona osan ho sira ne’ebé mak seida’uk simu osan.

Deskonfia servisu Komisaun Homenajen

Iha parte sorin, veteranus Suku Bibileo, Postu Administrativu Viqueque Villa, Munisípiu Viqueque deskonfia servisu Komisaun Homenajen (KH), nian no konsidera KH servisu lalos no manipulasaun ba dadus veteranu sira nian.

Veteranu Mariano Rangel lamenta katak, veteranu sira iha Suku ne’e, hatene malu tanba uluk halo servisu ida de’it, maibé KH manipula fali sira nian dadus hodi balun hetan 8 a 14, balun hetan de’it 4 a 7, no balun hetan de’it 0 a 3.

“Tanba sa komisaun homenajen halo ami Bibileo hanesan ne’e, ami ne’e  ida de’it, maibé halo fali veteranus sira balu hetan fali 0 a 3 no balu 4 a 7, balu hetan 8 a 14,  no barak mak la hetan. Mas ami nia istória ne’e hanesan, kona-ba akontesementu Kraras mos hanesan,” dehan Mariano Rangel ba Prezidenti Repúblika (PR), Taur Matan Ruak, bainhira partisipa mós iha Xefi Estadu Taur Matan Ruak, iha Suku Bibileo, Tersa (06/09).

Alende ne’e, veteranu Silvino informa katak, uluk FRETILIN hateten katak, aban bainrua FRETILIN manan atu habiskan.

“Uluk iha Primeiru Governu, FRETILIN hateten katak, veteranus tenki ba rejistu hotu atu hetan osan, maibé to’o agora laiha buat ida. Tanba ne’e, ha’u husu ba Prezidenti Repúblika, sé bele ba muda tiha lei veteranus nian ne’e,” katak nia.

Entretantu Hermegildo Amaral mós husu ba PR Taur Matan Ruak ne’ebé hanesan aman ba nasaun katak, jerasaun tuan sira tenki rai hela buat ruma ba jerasaun foun, atu aban bainrua aman sira katuas ona karik, jerasaun foun bele hatutan.

Alénde ne’e, nia mós kestiona katak, povu iha Suku refere nia oan, nunka hetan bolsa estudu mas Timor laran tomak hatene katak, povu iha Suku Bibileo ne’e mós terus maka’as ba rai ida ne’e.

Hatan ba preokupasaun ne’e, Prezidenti Repúblika (PR), Taur Matan Ruak hateten katak, imposível atu halo los fali veteranus sira ne’ebé grau lahanesan, tanba veteranus iha Timor laran tomak ne’e, barak tebes.

“Sé ita hadia fali ne’e, entaun tenki muda lei, sé la muda ne’e imposível, mas ha’u husu ba imi atu labele lakon konfiansa ba buat sira hanesan ne’e, tanba Estadu sei la haluha ema hotu nia kontribuisaun, ita laharii Estadu atu sai Estadu mau pagador, uza ema iha tempu difisil, iha tempu di’ak, nega ema nia favor,” katak PR Taur Matan Ruak.

Tanba ne’e, Taur Matan Ruak husu ba veteranu sira atu servisu hamutuk hodi buka solusaun ba sira nian problema  ne’e, no solusaun ne’ebé mak foti bele halo ema hotu kontenti.

Xefi Estadu ne’e hatutan, lei ne’e bele muda, mas sei muda para hot-hotu hakarak simu osan, entaun problema bo’ot liu tan, tanba osan sei la to’o.

Alénde ne’e, PR Taur Matan Ruak mós dehan, valor ne’e ema la fó tanba haree ema nia oin di’ak, valor ne’e ema fó tanba  hahalok di’ak.

Kona-ba bolsa estudu, PR Taur Matan Ruak dehan, Bolsa estudu ne’e, ba veteranu nia oan mós iha, ida jeral ba Timor-oan sira nia oan atu tuir konkursu mós iha, mas tenki apply, tanba bolsa estudu ne’e, buka ema ne’ebe matenek duni.cos

Jornal Nacional