12 NOVEMBRU, SAI EVIDENSIA LUTA JUVENTUDE

Prezidenti Parlamentu Nasional (PN), Aderito Hugo da Costa, afirma katak, loron 12 Novembru tinan 1991, masakre Santa Cruz , hanesan evidensia luta juventude nian.

“Hanesan mos sobrevivente ida husi 12 Novembru hakarak atu hateten deit katak, selebrasaun ida ne’e presiza halo nafatin para fo hanoin nafatin ba jerasaun foun mos ba sira ne’ebe moris depois 12 Novembro, tanba ita hatene katak joven sira nia papel importante teb-tebes iha tempu rezistensia ninian ne’ebe evidensia ida husi joven Timor Leste ninia kontribuisaun ba rezistensia mak 12 Novembru masakre Santa Cruz,” hateten Prezidente PN, Aderito Hugo ba Jornalista sira iha seminario ba Panorama Orsamental 2017, iha salaun Novo Turismo, Dili, Kinta (10/11/2016).

Lideransa masimu PN ne’e dehan, selebrasaun masakre santa crus ne’e hanesan kontinuasaun komemorasaun idaba akontesemenetu ida ne’ebe loke mundu nia matan husi terus naruk ne’ebe povu Timor Leste infrenta.

“Hau hakarak dehan, iha loron 12 Novembru 1991 joven sira hatudu sira nia vontade nasionalismu ho patriotismo oinsa luta kontra invazor sira,” dehan Aderito Hugo.

Iha fatin hanesan, deputado Francisco Miranda Branco, hateten katak, Estado Timor Leste iha prosesu konstrusaun hametin edeia Estado nian, mensagem diak liu maka sira (Joven-red) sai ezemplu ida ne’ebe ba ita hot-hotu, la’os deit ba jerasaun sira aban bainrua ba oin, maibe jerasaun sira ne’ebe mai husi ne’ebe deit mos tenke aprende, sai konkluzaun no reflesaun husi joven sira nia sakrifisiu sira atu ita kaer tuir katak ba ita nia Estado ita presija mos fo ita nia kontribuisaun oi-oin.

Reprezentante povu ne’e afirma, nudar jerasaun ida diak, tenke kaer ezemplu ne’ebe mak Joventude loriku asu wain sira halo ona hodi defende ita nia rain.

“Hau hanoin iha tempu ne’eba ita aprende prosesu luta duni, luta armada guerilha iha ailaran ida ne’e daet mai Cidade laran no hot-hotu moris iha situasaun ida ne’ebe ran nakali atu fo duni kontribuisaun ba ita nia luta rezistensia nasional, ne’ebe ita iha kontestu ida foun, ita labele haluha ita nia istoria ne’ebe naruk li-liu ba loron Joventude nian iha loron 12 Novembru loron ida ne’ebe mos lori tragedia ba joven sira hodi fo sira nia isin ba mate hodi sosa ita nia libertasaun da patria,” dehan Branco.

Nunee mos Primeiru Ministru, Rui Maria de Araújo hatete loron 12 Novembru tinan iha ne’e, ita selebra tinan ruanulu-resin-lima Massacre Santa Cruz, no loron ida ne’ebé mos Estadu Timor-Leste foti tiha ona  nu’udar Loron Nasionál ba Juventude.

Xefi governu nee, lori Governu nia naran hakarak hato’o parabéns ba joven Timor-oan hotu ne’ebé uluk dedika sira nia a’an-tomak ba Libertasaun Patria Timor-Leste, no halo votus atu jovem Timor-oan sira ohin-loron  nian, bele aten-barani hodi partisipa ativamente iha konstrusaun nasaun, konstrusaun Estadu no iha esforsu nasionál atu liberta Povu husi mukit no ki’ak. ami/ *

Jornal Nacional