Juventude Rezisténsia Sai Modelu

DILI, (ANTIL) – Sekretáriu Estadu Juventude no Desportu, Leovigildo Hornai hateten, juventude sira iha tempu rezisténsia sai hanesan modelu (referénsia) ba juventude sira ohin loron nian atu banati tuir.

“Prosesu konstrusaun estadu no nasaun, ita hakarak iha mehi ida katak joven Timor-Leste tenki sai joven ida ne’ebé iha inovasaun, kreatividade, abilidade ne’ebé forte para fasilita moris hodi partisipa iha prosesu dezenvolvimentu nasionál,” Leovigildo ba jornalista sira iha Palásiu Prezidénsia Repúblika, Bairu-Pité, Kinta, (10/11), bainhira husu ninia hanoin konba-ba Loron Juventude Nasionál ne’ebé monu iha Sábadu, (12/11).

Tuir nia, juventude ida agora tenke halo buat barak no halo buat boot liu-tan para reafirma hodi fó onra ba eroi sira ne’ebé mate iha funu laran espesiál sira ne’ebé oferese sira nia vida iha masakre santa krúz 1991.

Leovigildo esplika, tanbasá tau loron 12 Novembru nu’udar Loron Nasionál ba foinsa’e Timor-Leste tomak? Tanba, haree hosi nia natureza no nia valór sira ne’e nu’udar mensajen ida forte liu maka “sira nia mate maka ita nia independénsia”.

Sira mate atu ita reafirma no halo buat boot liu para depois nasaun ida ne’e sai orgullu ba timoroan tomak. “Mensajen forte maka ne’e katak mai ita fó liman ba malu atu hametin liu-tan unidade nasionál no hametin liu-tan ita nia identidade nu’udar timoroan para lori nasaun ne’e ba oin,” Sekretáriu Estadu esplika.

Iha fatin hanesan, Komandante Jerál Polísia Nasionál Timor-Leste, Komisáriu Júlio da Costa Hornai hatutan, juventude sira ne’ebé baku malu no oho malu iha era independénsia ida ne’e laiha valór liu.

“Baku malu no oho malu sei la simu medalla no sertifikadu. Entaun, nu’udar joven ida, ita tenke iha responsabilidade ba ita nia rain. Ita hakarak juventude ne’e hakmatek hodi kontribui ba ita nia nasaun nia dezenvolvimentu,” nia apela ba juventude sira iha Palásiu Prezidénsia Repúblika, Kinta, (10/11). (jornalista: Xisto Freitas; editora: Rita Almeida)

Foto: Sekretáriu Estadu Juventude no Desportu, Leovigildo Hornai