ELEISAUN SEGUNDA VOLTA, FP-STAE TENKI DO’OK HUSI MEJA ELEITORAL

Primeiru Ministru Interinu aktual Ministru do Estado Coordenador  dos Assuntos  Administração  do Estado Justiça e Ministro Administração  Estatal, Dionisio Babo, husu Funsionariu Públiku  husi Sekretariadu Tekniku Administrasaun Eleitoral (FP- STAE) tenki hado’ok  a’an  husi meja eleitoral durante eleisaun Suku  Segunda volta.

Eleisaun suku segunda volta ne’e sei hala’o iha Domingu (13/11) semana ne’e, hala’o deit  iha  Suku 300. Eleisaun  suku primeira volta  ne’e hala’o  iha Suku 442. Iha eleisaun ne’e rasik sei partisipa husi suku 300. Restante husi ne’e la tuir eleisaun ona.

“Ha’u husu  mós ba  Funsionariu STAE   nian atu labele  ba komplein partisipa  iha meja oin eleitoral, tanba  iha keisa ida rua iha ema STAE nian ba partisipa  iha meja eleitoral. 

Se mak husi STAE ba partisipa iha meja eleitoral, ha’u husu ba  Diretor sira  STAE iha foho atu fó hatene hasai troka kedas,”esplika Dionisio Babo, liu husi diskursu, bainhira halo distribuisaun buletin votus eleisaun Suku ba segunda volta nian iha edifisiu  STAE, Kinta (10/11).

Buletin votus  ne’e imprimi husi Kompaña Gráfica Nacional,  ne’ebé mak  nain  husi emprezariu Timor oan, aktual Prezidente Administrasaun Grupo de Média Nacional (GMN), Jorge Serrano.

Seremonia entrega  buletin votus  ne’e hala’o diretamente  husi Ministru Estatal Dionisio Babo,  Administrador Munisipiu sira no Administrador Postu sira. Hafoin entrega buletin votus  hirak  ne’e,  Administador Munisipiu no Administador Postu, inklui FP-STAE Munisipiu sira lori kedas buletin votus ba Munisipiu no hetan seguransa  husi Polisia Nasional Timor   Leste (PNTL).

“Istoria ida tan mak  ita tenki temi ona istoria, primeira ves   buletin  votu imprimi  hotu kedas iha Timor   iha emprezariu Timor oan mak kaer. Kuandu ultima hora mak difisil tebes-tebes  nia iha kapasidade tebes imprimi dois mil e vinte sinco  Aldeia. Tanba  ne’e mak  ita bolu istoria,”hatete Dionisio Babo, akompaña basa liman husi partisipante sira.  Primeiru Ministru interinu  ne’e lembra hikas katak, eleisaun  primeira volta  ne’e ema barak preokupa dehan  meja eleitoral  ema nain tolu deit, nain ida hakerek  to’o liman  kolen,  ne’e los duni.

“Ita sei prepara lista naran  por Aldeia, lista eleitorais,  votante sira nian.  Tanba  ne’e ema ida la vota dala rua. Tuir lei la obriga tau tinta, mas  nia naran mai kuandu check iha kartaun eleitoral  tau vistu nia labele mai dala rua.  Iha  primeita volta deit mós Timor oan hatudu ona katak,  sira la vota dala rua.  Ne’e hatudu katak  ita ninia koñesimentu kona-ba prosesu  demokratiku ne’e diak tebes,” hatete Dionisio Babo.avi

Jornal Nacional