La’o Tuir Ain to’o Drama Masakre Santa Kruz

DILI - Komemorasaun Masakre Santa Kruz ne’ebé monu iha loron 12 Novembru, nu’udar mos loron ne’ebé estadu rekoñese hanesan loron juventude sira nian. Selebrasaun ba tinan ida ne’e, tuir planu, Komite 12 Novembru sei realiza atividades  la’o  ‘tuir ain fatin’.

Atividade la’o tuir ain fatin ne’e hala’o hahú  hosi Tasi Tolu ba  Motael, Novu Turismu no ba Santa Kruz, hodi hanoin hikas fatin sira ne’ebé juventude sira iha momentu ne’ebá halibur hamutuk hodi halo demostrasaun kontra okupasaun Indonézia.

“La’o tuir ain fatin sira ne’ebé maka uluk sai fatin ba juventude rejisténsia sira konsentra hodi halo manifestasaun kontra okupasaun Indonézia nian,” dehan Vise Presidente Komisaun Organizadora komemorasaun 12 Novembru, Filipe Rodriques Pereira ba jornalista sira iha Kampuz UNTL Fakuldade Ekonomia Liceu Dili, Kuarta (09/11).

Filipe haktuir, to’o iha santa kruz, juventude atus rua maka sei halo drama ida hasoru maluk juventude rejisténsia sira ne’ebé maka la’o  ain hosi Tasi Tolu mai ne’e, depois sei tama ba rate santa kruz laran.

“Iha loron ida ne’e tuku hitu kalan ita sei halo tolsou ida ne’ebé maka transmisaun dereita ho TVTL iha rate santa kruz, depois ida ne’e ita halo refleksaun, depois ida ne’e mós ita seremonia cultural sé matebian hodi bolu fali matebian sira ne’ebé maka mate to’o oras ne’e ruin sedauk hetan ne’e, ne’e lian nain sira ba iha ne’eba hodi oho nimal hodi halo tuir buat sira ne’e depois dadersan misa iha Motael,” nia dehan.

Misa tuku ualu sei hahú  iha Motael, depois misa sei la’o  hosi Motael mai santa kruz hodi nune’e komesa seremonia masakre santa kruz no komemoras mós loron juventude Timor Leste nian.

“Iha loron 12 Novembru ne’e maka iha seremonia lansamentu hatur fatuk dahuluk ba monumentu 12 Novembru nian, iha mós inagurasaun radio 12 Novembru I nomós ami prepara ona ekipa ida atu hakerek livru 12 Novembru nian ne’ebé maka inisia hosi Sekretariu Estadu Juventude no Dezportu,” nia esplika.

Tema ba tinan ida ne’e nian maka, hamutuk serbi fó onra ba aswain sira, tanba sa maka foti tema ne’e, tanba serbi ba estadu tenke lorloron liu hosi maneiras oioin, aspetu oioin, ne’e maka atu servisu hodi fó onra ba ema sira ne’ebe mate tanba rai ida ne’e.

“Konvidadus sira maka hanesan tinan tinan, ita konvida membrus govenru sira, parlamentu nasionál, konvida korpus diplomasia nomós família matebian sira inklui mós konvida juventude sira hodi partisipa iha loron 12 Novembru ne’e,”Filipe esplika.

Orsamentu maka sai opstaklu ba sira, tanba ita boot sira hatene, tinan tinan orsamentu hosi Sekretariu estadu juventude no dezportu rihun atus ida rua nulu resin ida.

“Hosi orsamentu hirak ne’e, ami  fó rihun ualu nulu resin sia ba postu administrative sira hodi komemora mós tinan 25 masakre santa kruz 12 Novembru I realiza mós seminariu iha postu administrative sira,” nia salenta. (fer)

Timor Post