Emilia Kontinua Halimar Ho Tribunal

DILI - Arguida Emilia Pires kontinua la kumpri no halimar ho tribunal, ultimatum ikus neebe tribunal fo tan tempu loron 8 ba arguida Emilia Pires hahu iha loron (4/11) too (11/11), hodi legaliza relatoriu medicu iha dokumentu nia laran, maibe arguida kontinua la kumpri no too agora seidauk fila mai TL.

Tuir informasaun husi defesa Emilia Pires Advogadu Privadu Pedro Camoes deklara ba Jornalsita sira, iha Tribunal Distrital Dili, Segunda (14/11/2016) katak, desde halo operasaun iha loron (5/11) too agora nia parte seidauk simu informasaun ruma. Nia rasik manda ona mensajem no telefone, maibe nia kliente la fo resposta.

Iha loron (4/11) liu ba, defesa arguida Emilia Pires nian garantia katak nia kliente sei fila mai TL iha loron (11/11), hodi nunee iha loron (16/11) bele kontinua ho julgamentu, maibe ida nee la akontese.

Iha fatin hanesan tribunal hatete, too agora arguida Emilia Pires seidauk legaliza relatoriu medicu iha dokumentu nia laran. Loron 8 neebe mak tribunal fo para arguida bele legaliza relatoriu medicu kona ba operasaun nian, maibe ida nee aguida la halo. Neebe tribunal sei foti desizaun iha loron (16/11) tuku 16:00.

Antes nee Ministeriu Publiku hatete, ho rekerimentu oioin nee hanesan maneira ida ba arguida atu halai ses husi tribunal ho razaun halo deslokasaun ba fatin-fatin. Depois dehan atu halo tan operasaun. Arguida nee halimar liu ho tribunal, tanba nee husu ba tribunal atu altera medida koasaun no aplika mandadu kapturasaun ba arguida.

Sekuandu husik hela deit aban bainrua sei mosu tan rekerimentu hodi halo alterasaun. Tanba nee MP husu ba tribunal atu aplika mandadu kapturasaun,” tenik Prokuradora Angelina Saldanha.

Entretantu defesa arguida Emilia nian, la konkorda ho MP atu halo mandadu kapturasaun. Tanba arguida sempre halo justifikasaun mai tribunal bainhira atu sai ba rai liur, neebe rekerementu sira nee iha razaun hotu. Rekerementu ida nee kona ba relatoriu medicu nian neebe aban arguida sei halo operasaun no loron (11/11) mak nia fila mai Timor. Informasaun kompletu iha STL Jornal no STL Web, edisaun Tersa (15/11/2016). Domingas Gomes

Suara Timor Lorosae