LERE HAKFODAK BUP FAHE AMBULANSIA

Xefi Estadu Maior Falintil-Forsa Defeza Timor-Leste (F-FDTL), Major General Lere Anan Timur, senti hakfodak ho Partidu Bloku Unidade Popular (BUP) ne’ebe mak fahe ambulansia ba suku sira iha Timor-Leste.

“Partidu ida naran BUP ne’e sosa ambulanaia fahe bar-barak ba suku sira, ha’u lahatene se mak selu kondutor sira ne’e no oinsa ninia manutensaun,” duvida Lere Anan Timur bainhira sai oradador ba Seminariu ne’ebé organiza husi Juventude partidu FRETILIN iha salaun Sede Comite Central FRETILIN (CCF), Dili, Sesta (11/11/2016).

Lere dehan katak, Partidu FRETILIN hanesan partidu istoriku, no kualidade. Maibe seidauk bele sosa sasan sira hanesan ne’e, partidu BUP ne’e foin moris hanesan partidu foun, maibe bele fahe sasan sira hanesan ne’e.

Lideransa masimu F-FDTL ne’e hatutan, partidu bele barak maibe nia objetivu ida deit.

“Iha Partidu balu ema sira ne’e sai husi FRETILIN, hanesan Partidu Demokratiku, CNRT. Maibe balu deit mak FRETILIN laiha, balu ne’e lahatene mai husi ne’ebé,”dehan Lere Anan Timur.

Nia dehan tan, harii partidu tenke iha kualidade mak boot liu, labele haree ba nia kuantidade.

“Ita iha Timor matenek barak liu, maibe halo diak oitoan deit. Ami uluk Maun Xanana dehan ami atu sai ministru hotu, maibe ami lakohi, ami mak sai ministru hotu karik oras ne’e ita la halo manifestasaun kontra pensaun vilatalisia no hakilar korupsaun,”afirma Lere.

Iha biban ne’e, Lere ne’ebe mak sai orador ba seminariu Juventude FRETILIN nian ne’e husu ba Juventude FRETILIN nian atu sai joven ida ne’ebe matenek, badinas no banati tuir esperiensia heroi FRETILIN sira nian ne’ebe mak husik hela.

Entretantu, seminariu ne’e ho tema “REVITALIZA Espirito unidade nasional, hametin papel no hasa’e partisipasaun juvetude libertasaun povu”. Seminariu ne’e partisipa masimu husi juventude FRETILIN nian.

Bainhira notisia ne’e hatun seidauk hetan konfirmasaun ho parte BUP nian kona ba preokupasaun Lere nian ne’ebé temi BUP fahe Ambulansia.mia

Jornal Nacional