Santa Cruz ne’e Fatin Lulik

DILI, (ANTIL) – Deputadu Francisco Miranda Branco iha kalan reflesaun ba selebrasaun loron masakre Santa Cruz ba dala 25 hatete, Santa Cruz nu’udar fatin lulik no hakmatek ba timoroan sira hodi defende no liberta rai Timor.

“Tinan  25 liu ona loriku asuwain mai fanu matebian, hamrik ba libertasaun patria povu maubere nian”, Branco  hamulak iha kalan reflesaun, foin lalais ne’e iha Santa Cruz.

Autór ba manifestasaun 12 Novembru ne’e husu ba jerasaun foun atu labele mate tan hanesan istória iha tinan 25 liu ba maibé lori asuwain iha tempu foun hodi aprende ko’alia ba malu, haklaken domin no fakar kosar ben atu hetan matenek.

Ba jerasaun foun, lori paz, hamosu matenek atu dezenvolve rai Timor ne’ebé hetan ho sakrifisiu oin-oin hanesan mate  no fakar ran. “Nu’udar jerasaun foun tenke hanoin matebian sira nia sakrifisiu”, Francisco Branco hamenu.

Hodi dehan tan, juventude uluk nian sosa ona independénsia ho ruin no ran ne’ebé namlekar iha Timor laran tomak.

Husu mós atu matebian sira hotu, asuwain Timor nian atu mai fanun  timoroan tomak, liu-liu jerasaun foun hodi prepara-án simu jerasaun tuan nia kna’ar hodi tula iha kaba’as atu lori Timor Lorosa’e ba oin.

Iha fatin hanesan padre selebrante reflesaun, Amu Juvito do Rêgo Araújo fó sai, komemorasaun loron 12 Novembru atu fó hanoin ba jerasaun foun sira hodi konta no banate tuir iha sira nia moris lor-loron nian.

Tanba juventude sira ne’ebé mak mate iha tinan 25 liu ba ohin loron labele troka ho saida de’it, maibé inportante sira nia sakrifisiu marka permanente iha ita ida-idak nia isin hanesan fitar iha isin hosi labele repete tan masakre hanesan akontese iha tinan 25 liu ba.

Nune’e nia husu atu povu no ukun nain sira buka hakbesik-án atu prenxe ukun-án ne’e hodi kontribui ba dezenvolvimentu, nune’e povu Timor bele sente moris ne’e sai kmanek duke moris terus.

Padre Juvito hatutan, Timor Lorosa’e nia independénsia deve sakrifisiu juventude loriku asuwain sira iha tinan 25 liu ba, momentu refere halo ema hader hodi tau matan ba Timor nia sofrementu.

Entertantu, Prezidenti Komite 12 Novembru, Gregorio Saldanha hatete, tinan 25 rejista hela iha ita hotu nia memória, akontesimentu trájiku Masakre Santa Cruz, bainhira juventude loriku asuwain sira nia ran fakar nalihun iha fatin lulik ida ne’e. (jornalista: Manuel Pinto; editora: Rita Almeida)

Foto 1: Jornalista Max Stahl ne'ebé iha tinan 25 liu ba halo film ba akontesimentu 12 Novembru hodi fó sai ba mundu internasionál ko'alia hela ho sidadaun estranjeiru feto ida hodi haree labarik sira sunu lilin iha estrada Santa Crus, Sesta, (11/11) kalan. Foto ANTIL – Foto 2: Francisco Branco, deputadu hosi bankada FRETILIN