Euclides Simu Telefone Membru Polísia Involve Kazu Taibessi

DILI - Kazu entre joven Aldeia Temporal ho Becae Suku Lahane Oriental hodi harahun uma hitu ne’ebé akontese iha Sábadu kalan, (26/11), deskonfia envolve mós oknum Polísia Nasional Timor Leste (PNTL) na’in ida.

Segundu Komandante PNTL Munisípiu  Dili, Euclides Belo dehan, simu telefone katak iha oknum polísia balun maka envolve direita ba kazu ne’e no sei hein mandadu.

“Ha’u simu telefone duni kona-ba oknum polísia balun envolve iha kazu ne’e no ami halo hela prosesu sei hein mandadu mai ami sei ba kaptura,” dehan Euclides ba Jornalista iha Kuartel PNTL Munisípiu  Dili, Kuarta, (30/11).

Nia hatutan, bainhira akontese kazu ne’e polísia la konsege kaptura suspetu ruma maibé polísia hamutuk ho autoridade lokal sira buka identifika suspeitu ne’ebé maka envolve iha kazu refere.

“Ita ohin loron nafatin halo aprosimasaun ho komunidade sira iha area refere para la bele hamosu tan asaun hanesan ne’e, tanba la kontribui ba seguransa, no kazu ne’e sei iha hela prosesu investigasaun nian laran,” dehan Euclides.

Nia dehan, kona-ba membru ne’ebé maka envolve ne’e komandu tenki iha informasaun inisial par abele husu mandadu ba oknum PNTL ne’ebé maka envolve.

Nia hatutan, komandu Munisípiu  Dili la autoriza ba nia membru ne’ebé maka sai fali autór ba krimi, se sira envolve komandu ba foti kedas.

Antes ne’e Vítima Belarmino Desa haktuir, kronolozia akontesimentu bainhira joven sira hosi Temporal Taibessi ba festa ida iha Oribis maibé la’ós  joven Oribis sira maka baku malu ho sira, maibé ema hosi bairu seluk mais sira halai tama fali ba Oribis maka Temporal sira fila ba baku no tuda rahun uma ne’e no uma neen seluk.

“Ami mós la hatene mais sira fila mai tuda no baku rahun hotu tiha ami nia uma hamutuk hitu,” haktuir Belarmino ba Timor Post iha Taibessi, Domingu (27/11).

Nia hatutan, depois akontesmentu parte polísia to’o keda iha fatin hodi halo atuasaun hodi hakalma tiha situasaun ne’ebé akontese iha sira nia bairo.

Maske parte polísia konsege atua ona maibé la konsege salva komunidade sira nian uma ne’ebé rahun ona, to’o ohin loron komunidade sira nia uma seidauk hadi’a. Komunidade sira ne’ebé sai vítima husu atu suspeitu sira tenke responsabiliza. 

“Ami la hatene problema maibé ami maka sai fali vítima ba sira nia hahalok,” dehan Vítima ne’e.

Iha fatin seluk Komandante PNTL Munisípiu  Dili Superintendenti Xefi Pedro Belo dehan, kazu ne’e polísia atende ona no kaptura ona joven balun ne’ebé maka deskonfia envolve.

“Ita prosesa hela agora sei iha hela investigasaun nia laran hein de’it depois nia rejultadu maka ha’u fó sai,” dehan Pedro ba Jornalista iha Administrasaun Munisípiu  Dili, Segunda, (28/11).

Nia hatutan, atu klaru liu nia seidauk bele fó sai tanba kazu ne’e sei iha hela prosesu nia laran. (way)

Timor Post