Obama dehan katak Guterres “iha reputasaun ida ne’ebé di’ak tebes”

Prezidente Estadus Unidus, Barack Obama horisehik dehan katak, sekretáriu jerál ONU foun, António Guterres, "iha reputasaun ne’ebé di’ak tebes”.

"[Guterres] sei asumi kargu ida ne’ebé sei fó influénsia nomós impaktu bot ba mundu tomak. Notísia di’ak hotu maka katak nia iha reputasaun ne’ebé di’ak, hosi ema ne’ebé lidera ona organizasaun multilateral ba iha nivel ne’ebé as no halo atu ema hotu rekoñese katak efisiente duni”, tenik Barack Obama, molok hala’o sorumutu iha Casa Branca entre sira na’in rua. 

Obama hateten katak portugés-oan sira "haksolok tanba nia tulun ona ema sira ne’ebé presija ajuda, ho efikásia, efisiénsia nomós ninia abilidade” no hakfodak, tanba hili duni nia.

"Hatudu ka foti Guterres hanesan símbolu ba respeitu ida ne’ebé iha mundu tomak iha", dehan. Barack Obama, ne’ebé sei tuun hosi ninia kargu, fulan janeiru agora, haktuir katak ONU hanesan parseria “ba buat hotu” relasiona ho saida maka ninia nasaun halo.

"Ami-ninia parseria ho Nasoins Unidas, maka ajuda resolve ona problema/konflitu nomós dezenvolve sistema ida ne’ebé importante atu hasoru dezafiu transnasionál hirak ne’ebé bot, hanesan fluxu refujiadu, ka hanesan foin daudaun, mudansa klimátika, wainhira dezafiu ne’e sai bot/buras nomós ezisti inserteza bot iha mundu ne’e", nia hatutan tan.

Demokrata ne’e dehan tan katak importante maka atu “ONU hala’o serbisu ho efisiente, gasta osan ho lolos”, maski nune’e hatene katak Guterres bele jere ho di’ak.

"Ha’u fi’ar katak sekretáriu jerál tuir mai ne’e, bele sai nu’udar líder ida ne’ebé efikas tebes. No EUA-oan sira hakarak ona atu serbisu ho nia", hakotu Obama. Guterres sei halo juramentu iha loron 12 no nia sei hahú ninia mandatu Nasoins Unidas nian iha 1-janeiru-2017.

SAPO TL ho Lusa - Foto@ Michael Reynolds/EPA